【史高治叔叔】80後揸Maybach 有無再型啲呀？

Maybach係已有百年歷史嘅名車品牌，喺香港真係較少見，比較多人知道嘅就係大劉對Maybach情有獨鍾，如果記者去影大劉時，應該就會見大劉經常以Maybach出入，係啦係啦，就係嗰架車身長長嘅豪華房車，望落好鬼舒服。

有錢佬用Maybach無咩奇，即係高級Benz啫，不過以「80後」嚟講，咁後生就識Maybach，仲要有本事買嚟揸，講緊最平最平起碼200萬左右，呢位80後朋友真係令史高治眼前一亮。

為免女性朋友對佢有興趣，快快講埋先，佢已婚，仲已經有3個小朋友，係個好爸爸，好識教小朋友，亦好努力抽時間陪伴小朋友成長，所以忙到不得了。將來再有機會先再同佢講「湊仔經」，因為最近都係同佢講另外3個幫佢搵大錢嘅「朋友」。呢3個「朋友」就係──投資、投機、經營。

呢個80後本身喺大學讀工程系，之後就做工程師，佢一直好相信投資嘅好處，所以畢業後，一賺到第一份糧，佢就諗點做投資，股、債、外幣、基金呢啲咁common嘅投資工具，佢當然有留意啦，不過最特別係佢鍾意買村地！唔好諗住好似大地產商大規模咁買，佢係搵啲細細哋嘅村地，一有錢就買，由一、二百蚊一呎買到宜家，升到成一千蚊一呎，可見佢幾有投資眼光，錢咪就係咁賺囉，唔通諗住發達靠份糧咩？

識投資已經好叻，但係佢仲搵到唔少投機機會，可能係喺股票市場搵一啲比較高風險嘅行業板塊，因為佢好開通同好學，好願意花時間同精力研究，同唔同行業嘅行內人溝通。宜家，佢已經成為一家上市公司嘅執行董事。

除咗炒炒賣賣，佢仲有經營生意，更加估唔到佢呢個80後唔係做啲網上、科技生意，又唔係做後生仔嘅生意，更加唔關佢讀嘅專業，佢做嘅生意係幾傳統，仲俾人感覺幾大叔吓。佢喺三聖村開海鮮餐廳，三聖村本身有咁多間海鮮餐廳，又俾佢突圍而出到，生意好好，真係唔簡單。最欣賞係佢handle到班廚房佬，見佢本身斯斯文文，初時面對班粗聲大氣嘅廚房佬，佢話佢都要花時間克服成見，堅持唔鬧，學習點樣同班大叔溝通。宜家，佢經營得好，仲有意再擴充發展。

經營一盤生意就可以帶來cashflow，cashflow又可以用來投資同投機，於是又再錢滾錢，難怪一個80後就可以揸Maybach。佢話佢細細個就明白投資嘅道理，呢個應該係佢父母自小灌輸俾佢嘅概念，老套都講句：家庭教育真係影響小朋友一生。有本超經典嘅書《窮爸爸 富爸爸》，不妨看一看，就明白不同嘅觀念如何引領人走出截然不同嘅路。

作者：史高治叔叔
　　　後生嗰陣，大學一畢業就入咗大銀行商業部做Sales，跟一班有名有利嘅客人打交道，有時可以跟埋一齊飲飲食食，花天酒地、燈紅酒綠嘅生活，造就今日呢個身經百戰又識玩識食嘅嘅叔叔。不過自從做咗老竇之後，史高治叔叔修心養性，決定將行內鮮為人知嘅見聞，喺專欄裡面一一公開。