【史高治叔叔】派糖阿女都讚好 「即時生效」真係即時有？

以史高治多年喺銀行工作經驗，喺銀行做有時收風真係收得幾快，無論係上面啲政策、中小企業嘅發展等消息，不過最近有單嘢，作為前線人員嘅史高治都收唔到啲咩風。

話說9月頭，政府財金官員開記者會講話向中小企派糖，話有個好筍嘅貸款計劃。有日有同事走過嚟問：「有個客問我哋呀，話政府啱啱出咗個咩中小企六百萬貸款，你知唔知詳情？」

真係Sorry喔，史高治都唔太了解，甚至好似無咩聽過，銀行又真係無收到啲咩資料，唯有幫同事問吓其他同事同行家朋友。點知大家都話：「等下先啦，都未公佈details。」

為免自己太out，返屋企即刻打開電腦上網搵，原來喺9月4日財爺喺記者會提及為中小企提供最多600萬元貸款，可以延遲還款6個月，淨係還住利息先，6月期滿又可以再申請續期，即係合共以1年為上限，呢段期間只需要還息，唔駛還本金。史高治仲聽到波叔講咗句：「即時生效」，初時以為自己聽錯，就loop多兩次聽，真係聽到佢話「即時生效」，咁就真係奇啦，講到實牙實齒咁，但係到今日9月十幾號啦，史高治同啲行家朋友仲係未收到啲咩風。

一路loop我自己細細聲暗忖：「即時派糖……」，點知阿女走過嚟搭訕：「派糖好呀，我又要。」

嚇咗史高治一跳，問：「你又知好？」

「哈哈，唔知呀，佢話唔駛還（傻女，唔駛還……本金咋！）吖嘛，唔係好咩？」

「哈……爸爸都未知詳情喎。」

「吓，咁即係冇糖派呀？」

嗰一刻史高治突然政府宣傳片上身：「阿女，借錢嘅嘢，借得就梗係要還，你第日大個都係呀，記住：還得到先好借，知唔知？」

你知啦，講開借錢，梗係要灌輸正確概念俾小朋友。

「知道！」阿女大大聲回答之後，又走咗去玩。

史高治定一定神，再思考吓呢個連細路女驟耳聽落都話好嘅措施。明明波叔話係「即時生效」，但係史高治同啲行家都收唔到風，又會咁奇怪嘅……以常識理解，「即時生效」就真係即時生效，應該係已經正式落實嘅措施，正常情況係公佈之前要同相關機構溝通，話晒史高治同啲行家嘅僱主，都參加咗「中小企融資擔保計劃」的貸款機構，點解我哋呢班前線人員無收到更多資訊？如果真係有客覺得波叔呢個措施幾啱用，點知落嚟問完就兩手空空咁返去等消息，都幾令人懷疑究竟係真定假……

呢段時間，好多中小企都受中美貿易戰影響，生意大受影響，真係有唔少老闆客都覺得吃力，如果政府肯出手幫忙，大家當然覺得係好，只不過既然話係「即時生效」，大家都期望有更多資訊，唔想只係一個虛無嘅希望，令人不禁懷疑，今次政府係咪為咗急於對外公佈，而導致對內宣傳有所不足呢？

註：2019年9月17日截稿前的資訊。

作者：史高治叔叔
　　　後生嗰陣，大學一畢業就入咗大銀行商業部做Sales，跟一班有名有利嘅客人打交道，有時可以跟埋一齊飲飲食食，花天酒地、燈紅酒綠嘅生活，造就今日呢個身經百戰又識玩識食嘅嘅叔叔。不過自從做咗老竇之後，史高治叔叔修心養性，決定將行內鮮為人知嘅見聞，喺專欄裡面一一公開。