【史高治叔叔】悲悲悲──呢排銀行悲觀，身邊朋友又悲觀

大家呢排有無發現去尖沙嘴食飯少咗人，等位時間都慳唔少。史高治都有問過一位開餐廳嘅朋友，佢話：「唉，生意少咗20至30%左右。」

當然，都幾視乎咩區份，以前多自由行去嘅尖沙嘴明顯少咗人。不過，史高治見屋企附近做街坊生意嘅小店一樣咁爆，因為街坊點都要食飯，而邊個肯定自由行永遠嚟？可以話呢啲係遲早會出現嘅問題，啲蛋放哂喺一個籃喎，靠晒某一個地區嘅客源，自然風險大增。不過呢啲就交返俾啲老細諗啦。史高治想講第二樣：就係銀行有咩諗法。

此時此刻，史高治做緊嗰間銀行係持著保守、悲觀的看法，淨係睇戶口開戶業務同貸款，內部已有提醒，要特別留意三個行業──飲食、零售、旅遊。公司提同事係時候做KYC（Know Your Client），尤其是要重新review貸款，了解客人還款能力。可想而知，銀行對飲食、零售、旅遊呢三個行業，預期前景係比較悲觀。

講真，最大影響一定係外圍因素，中美貿易戰一定係影響經濟嘅最大嘅原因，甚至令人擔心會變成貨幣戰，而英國有機會「硬脫歐」亦係會增加環球避險情緒。外圍因素本身令好多行業面臨嚴峻嘅不穩定性，再加上本地政治事件，絕對會影響一般市民嘅消費意欲，有啲係心情受影響，有啲就擔心再有疑似黑社會無差別打人、有啲就怕遇上警察與示威者衝突、有啲就怕地鐵突然封站搞到有家歸不得，史高治就有gathering因為有啲朋友唔想太夜歸家而取消。

亦有朋友刻意減少不必要消費，因為要準備更多彈藥去移民，史高治身邊已有唔少朋友認真考慮移民，多數係似史高治呢個年紀，有啲屋企有未成年嘅小朋友，於是非常擔心前景，開始懷疑香港係唔係一個適合小朋友成長嘅地方，於是一心為小朋友去移民。

史高治好明白佢哋嘅諗法，有邊個父母唔想俾到小朋友最好嘅嘢？開始要擔心人身安全，唔肯定警察係咪真係會幫市民、黑社會大模斯樣出嚟打人、返大陸又要俾人查手機審問、喺屋企都驚催淚彈入屋，又驚出街買到受山埃污染嘅食材，呢個真係父母想小朋友成長嘅地方？有能力點解唔去搵更好嘅地方？

聽到好多朋友搬出無數個要走嘅原因，史高治仲算係樂觀嘅人，到今時今日，仲未想輕易放棄香港呢個屋企，覺得香港仍有希望，見到法律界、醫護界、宗教界、教育界、社工、記者、文藝界、航空界，甚至公務員，都一致要政府回應訴求，加上大部分年輕人都懂得獨立思考，既然社會上一班高學歷、高質素嘅精英能夠團結，史高治相信總會有明天。

當然，萬一香港出現人面監察，甚至係社會信用系統、再教育營之類情況，史高治都一定帶小朋友走人，唔會任人魚肉。雖然史高治比身邊朋友樂觀一啲，但係呢排都花多咗時間去好好檢視自己嘅資產，再了解朋友點樣搞移民，當係打個底都要做啲工夫。

所以呢，當一班悲觀中產有咁嘅諗法，一定會減少消費，本地民生嘢點會唔受影響呢？或者又有啲人會諗，大家一齊減少消費，等商家都出聲俾啲壓力俾政府，等政府快啲回應大眾訴求，好好解決問題。無論點都好，社會入面嘅中產階層，都有佢哋嘅影響力，希望事件快啲完滿解決，等我哋放心留啲細路喺香港成長啦。

作者：史高治叔叔
　　　後生嗰陣，大學一畢業就入咗大銀行商業部做Sales，跟一班有名有利嘅客人打交道，有時可以跟埋一齊飲飲食食，花天酒地、燈紅酒綠嘅生活，造就今日呢個身經百戰又識玩識食嘅嘅叔叔。不過自從做咗老竇之後，史高治叔叔修心養性，決定將行內鮮為人知嘅見聞，喺專欄裡面一一公開。