【珍寶豬欄】點解可以隨便掉我啲嘢呀

佢行埋嚟登記處：「你哋啲流感針用邊間公司呀？」
我：「XXX呀（英文名）」
佢：「講中文啦，蝦我唔識聽英文呀？」
我：「XXX呀（中文名）」
佢：「未聽過喎，聽都未聽過囉。」
咁你見識少又唔駛咁大聲話我知嘅～
我：「上網搵到㗎，要唔要我寫低個名俾你？」
佢：「我上次打嗰枝係咩公司呀？」
我：「你俾一俾你身分證號碼我呀，我幫你睇睇。」
佢：「XXXXXXX」
我睇睇電腦紀錄：「都係XXX呀。」
佢：「而家又係XXX，兩個月前又係XXX？你啲針唔換㗎？」
我：「流感針嘅藥廠唔係好多間㗎咋，我哋之前打晒，有再入過貨嘅～你問嚟做咩呢小姐？」
佢：「你俾返我之前打嗰劑嘅盒我呀。」
我：「你打嗰劑？兩個月前喎？醫生喺同你打完當日已經掉咗啦。」
佢：「我㗎喎？點解掉呀？唔駛俾返我㗎咩？搵人答我啦！」
我：「你嗰時冇話要嘛，隔咗成兩個月先嚟話攞返，俾唔返你㗎啦，就算你要而家嗰啲盒都係唔同批次…」
佢：「我冇話要而家嗰啲呀，我係要我打嗰枝個盒呀！」
我：「我真係幫你唔到呀」
佢拍枱：「你答我呀！點解可以隨便掉我啲嘢呀！我嗰日俾足錢㗎！」
我：「…下次你要嘅話早啲講，即時講，咁先可以俾到你。」

佢：「NEVER！冇下次呀！我唔會再嚟呀！我實上網唱你隨便掉屬於病人嘅嘢！」

小姐嬲嬲豬離開診所。

兩年前你喺度掉嘅紙巾，我要唔要幫你KEEP呀？

 （以上專欄由Dr-Max教材大王全力支持）