【買工廈】同靚女傾偈有着數 特別係做銀行嗰啲

一間公司仔可以養起咁多人同狗？你發夢啦！

我想講嘅係，今日我所擁有嘅一切，其實係要多謝一個人，係一個女人，一個當年我喺銀行遇到嘅靚女職員。話說十幾年前，我間公司得幾個員工，做買賣生意，就係嗰種搵到食但唔會賺大錢嗰隻。我嗰時會入下啲鮑魚、花膠咁，所以想租個倉嚟放下貨。係啦，說好的靚女職員呢？佢要出場啦！

有日，我追到個客拎票，急急腳走去銀行入票，一行埋櫃枱，嘩，眼前一亮，靚女職員真係好靚，好似蒸餾水咁純，笑容甜美，人類都鍾意望靚嘢，咁咪傾多兩句。

「Cool生，今日嚟入票？」

「係呀，追咗好耐，先追到個客張票。」

「辛苦晒。」把聲甜到呢，剎那間，真係覺得咩辛苦都唔緊要啦。

為咗聽多啲佢把聲，搲水吹下先，問：「係喎，有無識人有倉放租呀？」

「租嚟放貨？」

「係呀，你都知我會入下啲海味乾貨。」

「點解唔買個倉？」

「吓？」

「無呀，我見你都夠資金買個工廈單位呀。」

「唔係好貴咩？我月租先7,000蚊咋，買要幾錢呀？」

「宜家差唔多500蚊一呎，當買個3,000呎啦，先150萬，搵我哋做按揭，借到7成，你都係拎45萬出嚟，咁就擁有個單位，做埋業主，唔使交租畀人。」

「嗯，好似有得諗喎。」

「係架Cool生，我哋好多老闆客都自己買下office買下貨倉。」

我心諗，你講到咁easy……不過喺靚女面前，我Billy Cool都唔想失威，所以就話：「多謝你嘅建議，我會度度佢。」

唔係講笑，後來，我真係買咗個大約150萬嘅3,000呎工廈單位。

Well，一年之後，我見個單位呎價升咗200蚊，即係個單位升值60萬！呢次經驗，完全扭轉咗我對金錢的概念！原來用心經營自己嘅生意，竟然不及買中會升值嘅物業！曾經試過為咗出糧畀同事，堂堂一個老闆夜晚要做多一份炒散！攰到死都唔敢畀同事知！

今日，嗰個150萬嘅3,000呎工廈單位，已經升到呎價4,000蚊，即係1,200萬啦，不過我一直都唔捨得賣，因為佢見證住我同那位靚女職員嘅緣份，呀，唔係，係我同錢嘅緣份先啱。

唔怕老實講，我唔只揸住呢一個單位，因為買完佢之後一年，我一有時間就去睇工廈，一夠錢就買。我對工廈單位情有獨鍾，除咗因為那位靚女職員，更因為工廈單位水位夠低，而且呎數夠大，以前幾百蚊一呎，每呎升三幾百，3,000呎就賺到100萬。

今日所擁有嘅一切，都要多謝當年喺銀行遇上嗰位靚女職員。重要嘅嘢，真係要講3次！

作者：長腿爸爸Billy Cool

　　　人稱工廈界Cool魔，十幾年前買入第一個工廈單位，賺到第一桶金，從此改變對財富嘅睇法：有生意當然要繼續做，但想賺大錢就要有準確嘅投資角度！