【珍寶豬欄】廿幾蚊一罐嘅罐罐咁就被嫌棄了

雖然拎報告時，我都買咗泌尿問題方面嘅處方罐頭，希望可以多多少少幫到啲，但係個衰仔竟然聞兩聞就唔食，廿幾蚊一罐嘅罐頭咁就被嫌棄了。唯有繼續食返佢原先食開嘅普通罐頭，加水加水再加水，之後再針筒灌水灌水再灌水。貓每日身體所需要嘅水份係每公斤60ML左右，波波雞而家有3.7公斤，即係至少要222ML水～咁計一計，平時主要以濕糧罐頭為主食嘅佢，需要特別灌水嘅ML數應該唔會令佢覺得好難受。

不過用針筒灌多幾次水之後，佢開始一見到針筒就瞳孔放大雞咁眼望住我，好似想話我知『你又嚟？唔好啦，我就死啦』，到真正灌佢水時，佢就會好精靈咁吐返啲水出嚟，真係好鬼精靈嘅啫。所以我又轉咗個方法，就係用之前網購返嚟嘅木魚片加熱水，攤凍之後再俾佢飲，又或者雞肉乾再加熱水浸到出味，又成為另一味有味水！

而家我全家都好幸福，日日都飲多咗好多水，包括我自己。因為我都好怕自己有尿石～諗起都覺痛…

（以上專欄由Dr-Max教材大王全力支持）