【葉偉麟專欄】與孩子一起經歷錯得一塌糊塗、甚至放棄的過程

經評估後，孩子被證實是高智能阿氏保加症。這類型孩子相當聰明，記憶力特強，對自己有興趣的東西，可謂過目不忘。可是在人際關係方面，就絕對有困難了。

第一節他來到治療室，他用盡一切「充滿創意」的方式在測試我的底線。例如把整整兩盒廣告彩，混入兩支白膠漿，再加入大量沙，陶泥，直接在地上進行大型藝術創作。

我一直默不作聲，靜靜的陪伴他經歷整個過程。

40分鐘後，作品似乎完成了，

我說：「你嘅創作方法好獨特，從來冇人好似你咁試過。」

他沒有說一句話就離開了。但是他已經感到被肯定了。

他之後的作品一件比一件具科學硏究價值。
例如用紙張，直接建造了出一個過山車系統，用波子測試速度。

又例如，建立起一條大型飛機跑道，測試氣流穩定性及動力對不同接摺疊飛機相關的研究。

在我們互動的過程中，他就是專家，他主導整個過程，而我只是一個協助者的角色。

大約兩個月之後，家長向我說

家長：「佢無再逃學，同朋友關係好咗，而且成日都話要黎呢度玩，點解咁神奇？」

我：「其實你個仔係天才，佢喺屋企有冇成日做科學研究架？」

家長：「邊有咁誇張！拾荒者就有佢份！佢成日存埋晒啲唔等洗嘅垃圾，又纸皮又廁紙筒又存單，我跟手就幫佢揼晒，邊有咁多地方招呼佢。」

我：「佢唔鍾意返學，係因為佢本身係個好有主見嘅人，佢唔鍾意跟住老師嗰一套。但佢一唔跟，老師就罰佢，逃學都好正常。佢鍾意嚟呢度，係因為佢可以主導，感受到被完全接納，可以做返自己。」

家長：「以前又打又鬧都無效，而家竟然主動話返學，同朋友一齊合作做project ，講都無人信。」

我：「其實想小朋友改變，最重要嘅竅門，就係容許小朋友唔改變。即係接受。」

家長：「吓？咁咪等如縱容佢？」

我：「係接納負面情緒，並唔縱容錯誤行為。⋯⋯就講錯誤行為，咁你估下孩子心裏面，其實有冇「啱同唔啱嘅分別」？」

家長：「咁佢都咁大個，唔通真係唔知咩係岩定錯咩。」

我：「所以就算佢哋特登做錯野，或者唔小心做到一塌糊塗，甚至放棄唔做都好，佢哋根本就已經知道係啱定錯，唔使我哋再加鹽加醋教訓佢哋。呢個方法唔會改變到佢哋嘅行為。如果得，全世界家長都做緊啦。」

家長：「咁我應該做咩？」

我：「唔係應該做啲咩，反而係應該咩都唔做。」

其實只要陪伴在孩子身邊，與他們一起經歷錯，一塌糊塗，甚至放棄的過程，孩子就會感到被接納被容許，正向行為的改變，往往就在這刻發生的。

-------

文章轉載至「葉偉麟 兒童行為情緒治療師」Facebook Page