【葉偉麟專欄】每個孩子都是一顆寶石

媽媽問：「點解我個仔咁難攪？做功課唔專心發晒夢想咁，做嘢甩甩漏漏，扎扎跳無時停，總之鍾意搞下呢樣搞下個樣，仲成日駁嘴包拗頸，有時仲衰向同學郁手郁腳比老師投訴！冇樣嘢可以乖乖地順我意㗎？」

我：「佢似乎中咗好多專注力不足/過度活躍症徵狀。」

家長：「唔係啩，有冇咁嚴重呀？」

我：「咁當然先要經過評估後先可以確定。仔仔嘅行為咁反叛令你覺得好嬲？」

家長：「梗係啦，嘥晒啲時間喺度同佢搏鬥，真係命都短幾年！」

後來我們替孩子進行評估，確診他患上專注力不足/過度活躍症。在接受治療期間，其中一項重要任務，就是為孩子建立自信心，因為在他的世界，已經太多 "NOs" "DON'Ts" 出現，認為自己做事大多數都是錯誤的，內心充斥著內疚及自卑心理。

但如果家長對孩子的看法及態度能夠改變，孩子往往在情緒及行為偏差方面，亦會出現戲劇性改善的。

我：「仔仔好多野似乎都唔順你眼喎？」

家長：「我都唔想架，佢D缺點真係多到數三日三夜都數唔晒！」

我：「如果佢啲缺點可以變成優點，你又會點睇佢？」

家長：「哇，咁就不得了啦，咁佢實行攞諾貝爾獎都得啦！哈哈⋯」

我：「其實優點同缺點，只係相對性嘅。如果可以幫佢地將唔同嘅性格特質，適當咁擺位，佢地就立刻可以發揮所長，變成叻人啦！」

家長：「即係點？」

我：「例如唔專心，相對地即係唔會鑽牛角尖有多元化學習力; 發白日夢背後隱藏住創意無限；包拗頸可以睇成有主見；扎扎跳無時停即係精力無窮噃；無記性又可以變成唔計較；即使係衝動，放啱位都會變成行動果段。」

後來家長終於學會了如何順應孩子的特質，安排不同的活動及學習方式給他，加上不斷的鼓勵，孩子重新感受到自己的「能力」，重建自信，得以發揮自我。

其實每個孩子都是一顆寶石，很多時候，我們都朦著眼睛耳朵，還沒有真正替他們開發而已。