【珍寶豬欄】用牙籤醫便秘？

我：「你好，乜乜診所。」
佢：「我可唔可以喺度問你啲嘢？」

如果我設立一條２４小時診症熱線，每分鐘收費六蚊，你估有冇得做呢？

我：「請問咩事呢？」

佢：「我想問牙籤可唔可以用？」
我：「牙籤本身嘅存在就係設計出嚟俾人用嘅」
佢：「哦～係呀？」
係呀，個答案咁廢，希望你滿意啦～

我：「冇其他事嘅，我收.....」
佢截住我：「咪住，我仲有嘢想問」
皮呀～我：「請問咩事呢？」
佢：「我有啲confuse...會唔會拮損我？」
我：「或者可以考慮用牙線呀～如果你對牙科上有任何問題，我建議你去book個牙科醫生睇睇並了解吓～」
佢：「但係我而家呢個問題應該係你哋負責㗎？」
我：「其實你有咩問題呢？」

佢：「我好似便秘」

咁關牙籤咩事？你可唔可以解釋吓牙籤與便秘之間有咩共通點或隱藏關係？

我：「便秘嘅就嚟睇醫生啦～我哋今日應診時間去到七點」

佢：「我其實係覺得有一小舊攝住咗喺度先有事」
我：「咁你打嚟係想問....」
佢：「牙籤可唔可以用？」
我：「即係你打算自己用枝牙籤拮返嗰舊大便出嚟？」
佢：「應該係啦」
你都痴線嘅，你估拮魚蛋呀？

我：「我建議你都係嚟睇醫生啦，唔好令自己太難受啦」
佢：「喺醫生面前除褲檢查我仲難受....」
你以為醫生有癖好咩...
我：「你便秘啫，醫生都係會開啲藥俾你軟化大便先嘅，你到時去到廁所就唔需要檢查㗎啦～」
佢鬆一口氣：「唉，你早講嘛，我以為要俾醫生撩屁股呀，要佢幫我撩返出嚟呀」
我：「你係便秘冇其他問題嘅，都唔會嘅...你嚟睇醫生啦～」

嘟。

最後佢冇嚟到，我懷疑牙籤都係壯士斷臂了。