【做足準備】落雨去迪士尼咩玩法

行商店玩室內遊戲

香港迪士尼樂園最近新推出的夏日英雄活動，全部都係室內進行，唯獨是排隊要喺室外，落雨天去就要冒雨排隊啦！不過英雄見面同危機次元任務，都算是室內活動，帶住小朋友的話，唯有等雨細少少先排囉！

另外，鐵甲奇俠飛行之旅就全程室內進行，都算是落雨天避雨的好地方。而動畫藝術教室、迷離莊園的大宅、小熊維尼歷險之旅、小小世界、米奇幻想曲，與及快將結束的「巴斯光年星際歷險」，都是室內進行的遊樂設施，全部都適合全家一齊玩，落雨就啱晒！

玩晒之後都係落雨的話，就入去商舖睇吓有冇紀念品啱買，唔啱都可以入去行吓當避雨囉。

自備雨傘、車仔雨擋最好

如果入迪士尼的時候已經落雨，極度建議大家自備雨傘及車仔雨擋，車仔都最好帶備自己個架，因為喺迪士尼租用車仔、雨擋都幾昂貴呀！

車仔租用費要$100一天，而雨擋都要$50，如果一家人兩個小朋友，兩家人一齊去，四個小朋友已經要使$600蚊啦！

至於雨傘方面，其實迪士尼都算貼心，一遇落雨大家都可以輕易買到雨傘，佢哋會將遮放於商店的當眼處，大家一落雨入商店就買到把遮，真係好方便！

其實除了玩緊的時候不用淋雨之外，要從一個點行到另一個點都總會有淋雨的機會，大家如果遇正落雨，就真係要小心行事！如果大雨到遮都擋唔住，就選擇雨褸，或者先到室內地方避避雨，否則淋濕了的話，全日都唔會玩得舒適。

順帶一提，如果真係遇著落雨要去迪士尼玩，不妨為自己及子女帶備多套衣襪，濕起上嚟都有得換嘛！

提外話：話說上星期去迪士尼工作，見到連同汽球影相都要排隊，小編覺得好搞笑，同大家分享下。