【珍寶豬欄】你哋會唔會幫我啜岀嚟？

我：「早晨」

佢：「你呢度診所嚟？西醫呀？」
我個格局似賣豬肉？
我：「係呀，係咪要睇醫生？係嘅身分證登記啊～」
佢：「我問真啲得唔得？」
我：「嗯？」
佢望完左又望右：「你有冇幫人洗耳㗎？」
我：「我哋有工具可以洗啊」
佢：「係咪射水入耳嗰種？」
我：「係呀」
佢耍手擰頭：「呢個唔得呀唔得呀，我會頭暈㗎」
我：「咁冇㗎啦～我哋得呢個⋯」

佢：「你哋會唔會幫我啜岀嚟？」

⋯⋯我叫醫生幫你。醫生，忍辱負重呀！
我：「我哋得洗耳㗎咋，冇其他工具㗎啦～」
佢撩撩耳仔：「應該一啜就岀，好易搞」
我：「⋯我哋真係冇其他工具，一係你去搵返專科～」
佢：「你當我係bb咁啜鼻涕⋯」

Stop！我唔會當你係bb⋯你幾十歲人唔好咁多幻想好冇～
我：「先生，我哋做唔到㗎～」
佢：「一啜就岀㗎啦，我feel到唔係好入㗎咋，你睇吓呀」
我：「我同你登記咗先，你入到醫生房再俾醫生睇呀，我睇冇用嘅，醫生先係專業㗎嘛」

醫生喺房聽到：「⋯⋯⋯⋯」

佢：「你問咗醫生啜唔啜先啦，唔好嘥我錢啦」

我入到房都未開口問醫生，醫生就好決絕：「你唔好再玩啦，我唔會！快啲岀返去」

 

咦呀。我都冇講啲乜⋯個客叫我問你，我咪入嚟扮吓嘢⋯醫生，你誤會我了～

我行返岀去同先生講：「醫生都係建議你去專科，嗰度嘅工具會齊全好多，一定解決到你嘅問題。」
先生表情嚴重失落，邊講邊離開診所：「我自己啜到就唔駛求你啦⋯一啖就岀到啦⋯我都話咗唔入囉⋯」

唔好咁啦，啜嘢唔係醫生嘅專業嘛。