【情人節甜蜜驚喜】自製邪惡朱古力粒雪糕

就好似日本便利店最近又出咗新產品「生朱古力配朱古力雪糕」，濃郁嘅朱古力上面竟然放滿一粒粒幼滑嘅生朱古力！Dry睇都已經覺得極邪惡，超想食呀喂！

一打開個蓋，就見到一粒粒幼生朱古力粒，就算睇都覺得幼滑呀！

鋪上朱古力粉嘅生朱古力粒，好似好高級咁！

配埋生朱古力配埋香濃嘅朱古力雪糕一齊食，成件事太美妙！

圖片：互聯網

咁身在香港嘅我哋可以點？無嘢架！食唔到日本版果個咪自製囉，等我即刻教你整番個「馬穎版」朱古力粒雪糕啦！

材料：

便利店樂天朱古力雪糕一杯(好味版$20)

便利店雀巢朱古力雪糕一杯(平價版$8)

明治朱古力幾粒($26一盒)

朱古力粉適量(MILO粉都得)

做法：先將朱古力切細粒再放上朱古力雪糕面，然後灑上朱古力粉！完成！(製作Tips：無，因為零難度！)

覺得我好低能？不如睇下個成品先啦，係咪同日本便利店果款好似樣呀？味道都好好呀我覺得！

今個情人節唔想隨便買盒朱古力送禮，就試下整呢個啦，又簡單又好味，而且都叫做花過心思整呀(都要自己搣朱古力放入去、又要灑粉呢)，都可以稱得上係「愛心雪糕」呀！哇哈哈！