【唔洗學費】係屋企都可以蒙特梭利教育

蒙特梭利教育簡介

呢套教育方法係由瑪麗亞‧蒙特梭利所提出，佢強調呢個教學法係佢「發現」出嚟而非「創造」出嚟。佢觀察到小朋友其實係會意識到自己要成長，運用身邊事物作成教具去激發佢地自己學習嘅欲望。係蒙特梭利教育下，家長定位係排在小朋友之後，只係一個「協助者」角色；蒙特梭利教育係一種主張混齡學習嘅模式，方便互相學習，所以如果你報讀蒙特梭利教育嘅學校，學生之間有年齡差距都唔需要驚訝！

蒙特梭利教育特色

以往有唔少人質疑蒙特梭利教育，因為佢地上堂唔係睇書識字，而係做一d日常生活上嘅嘢，例如澆花、抹嘢、洗碗等。而蒙特梭利教育認為呢d日常生活上嘅技能，可以訓練小朋友從肢體、心智以致道德的發展；與此同時，由於六歲前的嬰幼兒，對身邊周遭環境都十分敏感，所以係呢個階段佢地主張發展學習興趣！如之前所講家長老師只係「協助者」，仔女遇上任何問題我地只會做觀察同指導角色，引導佢地自發地追求成長同獨立。

想仔女係香港接受正統蒙特梭利教育絕對唔平，不過唔洗驚，我地係屋企都可以蒙特梭利！

1.環境佈置

使用蒙特梭利教育嘅學校，機乎所有小朋友需要用到嘅嘢都放係佢地拎得到嘅位置，雖然呢點唔係個個屋企都做到，因為一般家庭嘅傢俬都有一定高度。不過我地可以整一個小角落，將佢地日常用到嘅紙筆、鉸剪(如可自行使用)放係佢地拎得到嘅位置，係洗手盤附近加一張安全嘅櫈仔，讓小朋友自行洗水杯等等，都係可行方法。

2.提供動機

要提供一個動機作教具，最好就係揀一d小朋友每日都會做又熟識嘅事！簡單而明確嘅任務最能引起小朋友興趣，例如要食飯就要先自己「裝飯」，食完飯就要自己洗乾淨隻碗！呢d良好嘅生活習慣都係小朋友學習嘅動機，不過要注意嘅係一定要衡量小朋友有冇能力做到。

係呢到提供一個最簡單又適合作教具嘅日常生活事比大家，就係「洗菜」，小朋友食自己親手洗嘅菜都會特別有成功感，亦都係點解係蒙特梭利教育下成長嘅小朋友會特別有自信嘅原因之一。

3.常見蒙特梭利教育小遊戲

係使用蒙特梭利教育嘅學校裡面，你有時會見到小朋友使用鉗去夾一d波子，然後放入碗仔；又或者見到佢地用膠鏟將浮在水面嘅東西鏟出嚟……其實我地係屋企都可以做到﹗或許你會覺得呢d係一些好無聊嘅遊戲，但小朋友卻是樂此不疲。因為將物品夾到指定位置係一項簡單而明確嘅任務，每成功完成一次，小朋友都會獲得成就感，而且玩果陣你仲會留意到小朋友異常專注同安靜！好多人問點解係蒙特梭利教育下嘅小朋友特別有規矩，就係透過呢d小遊戲訓練。

其實生活當中有好多細節位都可以運用到蒙特梭利教育嘅理念，亦因為現代家長開始反思傳統教育過份死板及壓力太大，所以令蒙特梭利教育開始慢慢得到香港家長認同，如果你都認同呢個教育方法，不妨一試上面嘅方法啦！

圖片：網絡