【明慧隨筆】與兒子對話系列(一)

晚上洗緊碗時，阿仔走來掹住我衫尾.....

仔：媽媽，無人同我玩嘅，你同我玩好唔好啊？
我：媽媽要洗碗，洗好同你玩，好唔好？
仔：咁我幫你洗，咪快啲洗好囉！
我：係喔！乖仔！
仔：咁你俾對手套我啦！
我：淨係得大碼，無細碼，唔啱你對手用喔！
仔：（扮喊）咁點算啊？你咁辛苦洗碗，我又幫唔到你。

我......笑咗！！！哈哈哈！！！

早晨對話：

仔：媽媽，我踩死左隻蟲蟲啊！
我：唔好踩佢，可以趕佢走或者捉佢出去。如果你唔敢捉，叫媽媽幫你。
仔：我點都可以自己捉。
我：點解啊？
仔：因為驚你辛苦囉！
我：哈哈哈！

然後，砌左呢架車獎勵佢，因為小朋友係要有適當的表揚。

阿仔同舅父的對話：

仔：舅父，你一定要印呢架火車俾我！

舅：點解呀？

仔：我一定要㗎！如果唔係，我就咩㗎喇！
我和舅父：(好奇地) 你會咩啊？
仔：我就會叫你印多一次㗎喇！
哈哈哈！原來佢嘅威脅，係叫多你一次！！

洗好碗，問阿仔做好功課未：

仔﹕一早做好啦！不如我出啲功課俾你做好唔好啊﹖

我﹕好呀！唔好出咁難喔！

仔﹕好難㗎！不過你唔識，我會教你做。

我...心裡已經暗笑。

佢畫左16個格仔，要我寫16個「舌」字。

仔﹕你寫字啦！要全部寫曬！

我﹕媽媽寫好喇，寫得靚唔靚﹖

仔﹕靚，不過無我寫得咁靚。

我﹕唔係喔，我覺得好靚！

仔﹕咁你覺得靚，我覺得唔靚呀嘛。

我...頭頂有三條線，哈哈哈！