【美食展後分享】立體柑橘乾果超過癮

咁去美食覽博要有乜準備呢？就係要推車仔喇！因為原來展場入面大部分抵買嘅食材都係好重嘅，例如醬油、生果、飲品等。如果你唔推架車仔或者喼去裝貨，單憑一己之力，就算你有錢買都絕對無手拎！所以推車仔或喼去美食展，係要去過嘅人先會知嘅「秘技」。咁所以今次雖然我見到好多嘢都好抵買，但最後好多都無買。

淨係喺現場食咗好多嘢，同埋買咗啲我拎得到嘅零食，就好似呢個我喺美食展買嘅乾果零食咁。

呢款新西蘭Fresh As 3D立體生果乾同平時食開嘅生果乾賣相完全唔同，一般生果乾通常都又扁又皺，顏色暗啞，感覺好似放咗好耐咁。有啲生果乾仲加入好多糖，唔太健康。

但呢款立體生果乾就非常立體，顏色與新鮮生果基本上無異，纖維仲清晰可見。

現場Sales話可以整到咁係因為佢地唔係用一般傳統曬乾或烘乾，而係採用先進凍乾技術，係極低溫下將水份抽乾，所以大部份營養得以保存，且不添加糖、防腐劑及人造色素。

加上百份百於新西蘭生產及包裝，品質監控及衞生程度絕對可靠咁話。

士多啤梨仲靚，好鮮艷！

咁事實上，佢啲乾果又真係幾靚同幾好食嘅！我當時係用推廣價買咗5包($18一包)。但就唔知美食展完之後，出面賣幾錢同邊度有得賣喇！