【珍寶豬欄】我真係做得好錯

我錯了。我真係做得好錯～

呢個星期，波波雞嘅大便成為咗一PATPAT爛嘅…睇住佢個肚痛到成隻貓都縮埋一舊，我個心好痛。原來問題係出自我身上…

事緣我獲得一批新主食罐頭，我好開心可以減輕吓我呢方面嘅負擔。點知，食食吓覺得有啲唔妥，佢哋竟然可以一貓食一罐125g…125g對於一隻正常貓嚟講已經可以係一日先食得晒嘅份量。而佢哋係可以一餐搞掂，太恐怖啦！於是我刻意減佢哋食量，以免食窮自己，我將原先一貓一罐，減成兩貓一罐。不過可能之前食大咗個胃，佢哋個個都好似餓鬼上身咁…

波波雞突然有日朝早，聞兩聞唔再食，我以為係佢個王子奄尖病又發作，點知返到嚟同佢人手放大便，一按落去，佢放咗個爛屎屁有汁有屎…再之後輕輕向下一推，成篤軟軟爛爛就呈現眼前。嚇得我騰騰震呀！

之後我先知原來大概係因為我太急俾新罐佢食，我以為罐頭反正大家都是肉，應該唔駛好似乾糧咁麻煩要循序漸進逐啲加份量咁換，點知原來係我諗法太天真。原來罐頭都需要1新罐：9舊罐，2新：8舊，3新：7舊咁慢慢換上去，等腸胃可以慢慢適應，減低腸胃不適。

呢次真係我考慮唔夠周詳，令到波波雞白白受苦了，我會認真反省。希望大家唔好犯我今次犯嘅錯，都同樣知道原來罐頭都一樣要時間適應，屙爛臭亦唔駛驚到即刻搵醫生，問題持續時先考慮停新罐，再冇改善先去睇醫生都未遲。

（以上專欄由Dr-Max教材大王全力支持）