【慈慧幼苗】慢慢來 便會快

朋友A一向做事講求效率，對己對人要求甚高，連管教四歲的仔仔都一樣，「我仔仔每朝換校服都總係慢吞吞，要我三催四請，試過有次返學仲遲到添，所以我每朝對佢講得最多嘅字就係『快』，真係講到口水都乾埋。」

 朋友B和應道：「唔止你仔仔，我嗰女做功課勁慢，小學啲功課又多，成日都做到三更半夜，愈催佢，佢就做得愈慢，跟住就會發脾氣，搞到大家心情都唔好，影響親子關係。」

朋友C：「之前我嗰仔食飯食到好似蝸牛咁慢，我叫佢食快啲，佢就反問我點解成日都催佢，有時真係俾佢激死。後來有朋友介紹我睇一本叫《牽一隻蝸牛去散步》繪本，故事是講述上帝給作者一個任務，叫他牽一隻蝸牛去散步。作者起初不停催趕，蝸牛仍是爬得這麼慢，後來，他鬆手了，不再催逼，反而自己開始留意到很多以前忽略了的東西：花香、微風、鳥叫，蟲鳴……作者忽然想起來了，莫非他錯了？是上帝叫一隻蝸牛牽他去散步。從這個故事，我提醒自己要慢慢來，唔好催促仔仔，好似牽着蝸牛去散步般，慢慢欣賞沿途風光，享受育兒過程豈不是更好？」

朋友A，B本來你一言我一語地討論着，聽完C的分享，頓時安靜下來，「咁我哋真係要買本繪本睇睇先。」

朋友C繼續分享：「網上有一條真實嘅龜兔賽跑短片，都好值得我哋睇，反思育兒的態度，原來慢慢來，便會快啊！」

於是，大家仿如茅塞頓開，埋首上網找那條龜兔賽跑的短片，畫面認真搞笑。

解說：

很多父母都會經常催促子女盡快完成所有事情，例如：做功課、吃飯等，連子女發脾氣，都要他們盡快平伏情緒。然而，沒有人喜歡被催促，當父母不斷催促子女，只會令子女的情緒變得煩燥，自己亦會很忟憎，形成互相角力，影響親子關係。更甚者，有些孩子愈被父母催促，會愈刻意放慢完成要做的事情。

在育兒路上，父母不妨嘗試放慢腳步，給予孩子多一點時間，正如《牽一隻蝸牛去散步》繪本中的主角一樣。在處理子女情緒方面，謹記情緒是需要時間去宣洩，家長們可能只要多給半分鐘來平伏情緒，便可以省卻之後要用更長時間來處理他們被壓抑的情緒。

所以，建議父母為子女訂立時間表時，請預留多一點空間，不宜急趕完成每一項的生活事務。

由慈慧幼苗親子學堂 註冊社工Rainbow 提供