【爸媽小心！】人生總會瀨幾嘢 「高價」購入疑似劣仿日本口罩記

話說前排行街，小編見到一間小店買緊一款之前大熱嘅日本口罩，又防UV又防花粉咁，又標榜可以洗乾淨再用，雖然一包得3個，又差唔多30蚊一包，但見講得咁好又就嚟轉季，就貪新鮮諗住買返包放公司備用。點知拎到返公司，同同事日本買返嚟果包一對比，哇，差咁遠嘅？原來我買左疑似假貨啊！

（左邊疑似假貨、右邊為日購正版）

無對比都唔知自己幾傻幾天真，拎包正版比較，就會發現真貨表面嘅印刷顏色比較柔和，表面好似有層霧面咁，而疑似假貨果包，顏色好鮮，隻黑色亦黑得好實色，仲有少少反光?。

（左邊為正版、右邊為疑似假貨）

日本產品包裝一向都好精緻，連小細節都會顧得好好，正如上面呢兩包咁，雖然同樣係密實袋設計，但正貨就算包裝袋被撕開過，上面啲字都仲係度，而疑似假貨撕開後啲字無咗一半⋯⋯

（左邊正版、右邊為疑似假貨）

厚度方面，兩包一對比，即即高效立見，正版果包厚身好多，用手指按壓會覺得好軟綿綿，疑似假貨果包則比較單薄，按落去無乜感覺⋯

（左邊正版、右邊為疑似假貨）

再拎出口罩，就會知點解兩包嘅厚度點解差咁遠！左邊正版係以磨紗嘅厚身膠袋密封住，而疑似假貨則用質地較薄、且令身嘅膠袋密封住，仲幫你做埋真空處理?。

（左邊正版、右邊為疑似假貨）

一拆開，兩個口罩都好大差別！疑似假貨果個聞上去有陣膠味，雖然話正版都有啲氣味，不過就比較輕微。最重要係設計上，版口罩顧及下頷嘅弧度，所以口罩近口部以下個位會特別拱，扣住耳仔嘅兩個圈都較為長同寬。而疑似假貨口罩則較扁平，成個口罩程呈V型。

疑似假貨嘅棉料質地較薄，質料亦不夠挺身，容易變形

正版質地較厚身，但較為貼面，上手感覺微涼，有少少似橡膠質地，較為親膚。

 

 上網去淘寶望過吓，見到有好多同我包裝相近啲疑似假貨，原來內地人好多人都話呢款口罩有好多假貨，所以買時要小心！唔知我買嘅，又係咪淘寶假貨呢…唉，人哋話人分錢一分貨， 但今次我幾乎用正貨價，買咗件疑似假貨，真係中哂計，只好以此為鑑啦！