【為5蚊報警】成盆花放入車廂 的士司機收費被投訴

新年個個都鐘意買年花返屋企擺設乃無可厚非嘅事情，呢位乘客就將成盆花擺入車廂，到達目的地後，司機向佢收取額外5蚊費用。

就係呢個Moment個乘客爆啦，大鬧司機亂收車資，「抵你一世揸的士做狗」，可能大家都無比的士司機收過呢5蚊，番查收費表，原來呢5蚊係合情合理，難怪司機都忍唔住大吐苦水。

(運輸署圖片)

不過即使收費合理，事情都無因此而告一段落，香港人最鍾意係咩啊？無錯就係投訴！

本身「深井5蚊哥」係投訴司機濫收車資，發現收費合理後當然唔會咁輕易放棄，於是改為投訴無禮貌不守規矩，不過司機就話，一開始都好有禮貌對佢，但佢又「成世做狗」又問候家母，唔通仲四萬咁口對於佢咩。

最後呢位的士司機大呻投訴制度不公，乘客為左區區5蚊合理車資浪費警力之餘，當日連做生意嘅時間都無埋！不過有小部分網民就企係乘客一方，話司機應上車前先講明會收5蚊，同埋件盆花算唔算輕便行李都係主觀嘅事，更有人話司機連5蚊都貪，令司機睇完嬲上加嬲，決定將呢程賺嘅血汗錢全數捐出，力證自己唔係貪果5蚊，果然有骨氣。

除咗家家有本難念的經之外，各行各業都會有佢地辛酸嘅一面。多設身處地，用多角度去睇每一件事，咁就自然少d投訴，各行業都可以減少戾氣，為大家提供更優質服務！唔好令「投訴之都」呢個污名，烙印係香港人心底。

圖片：網絡群組