【讀者投稿】最低工資加兩蚊 買餸又要加價

我一個師奶仔聽到呢個消息簡直就係晴天霹靂，如果可以選擇，我情願政府唔好搞最低工資！首先，我唔係否認最低工資係一件百份之一百嘅壞事，但係我地依家呢個最低工資根本就無效，香港絕大部分嘅勞動人口都拎緊高過最低工資嘅薪酬，簡單嚟講就係所謂嘅「成本上升」只係好少好少，而商家就會用四兩撥千斤嘅方法，最低工資加6%我咪加價10%轉嫁返比消費者囉﹗大家仲記唔記得前幾次上調最低工資果時，第一時間就係商家跳出嚟話自己好慘，比多幾蚊好似會馬上令舖頭執笠咁，逼住佢地加價……相信今次都唔會例外，仲唔趁機加價﹗

講加價，首當其衝一定係管理費同食肆，一個正常屋苑嘅清潔工又好，食肆侍應都好！拎緊時薪低於$34.5嘅有幾多個？大家心知肚明，商家就利用我地對類似低技術工種嘅偏見，話自己成本大大上升，生意好難做﹗之後又可以順理成章加價。

唔知大家仔女鍾唔鍾意食薯條？我小朋友每日放學都會扭計話要去M記，要我買薯條比佢食。上年12月講緊細薯條係5蚊一包，依家已經賣緊6蚊，加左成20%價！如果呢個無效嘅最低工資又通過，我相信距離10蚊一包細薯條又更進一步。

所以最終最低工資唔單止唔係保障緊基層或者低收入家庭，變相害左佢地令百物加速騰貴！與其比借口商家加價，不如先著手搞好標準工時同法定假期先，唔好搞到香港人家庭時間又無，樣樣嘢又貴曬，生活得越嚟越痛苦！

*以上文章只代表投稿人立場，並不代表《親子頭條》立場

如果讀者有興趣投稿，可把文章 E-mail 至 editor@parentingheadline.com 並寫上「讀者投稿」及註明題目，一經選用有機會刊登在親子頭條網頁及Facebook專頁。