【唔識揸車都無問題】沖繩免費睇海豚表演＋必去水族館

去沖繩好多人會選擇住那霸市然後租車自駕遊，不過小編係一個無車牌嘅人，早前見到有超平機票仲快手買左兩張同仔仔去！不過去到發現原來無車都唔係大問題，係那霸巴士站附近有好多Bus tour可以比大家報名，部分團仲有中文導遊，收費仲唔貴！不過中文團就好快Full，我地果陣都報唔到，繼而報咗日文導遊，其實聽唔明都無所謂，只要記得上車時間就無問題。

小編就報左一個最熱門嘅Bus tour，行程大約係那霸市--->美麗海水族館--->今歸仁城跡+古宇利塔

強烈建議大家帶專業少少嘅相機去，唔好浪費咗個景佢！上面兩張圖都係我坐緊車果陣求其用部IPhone影，有咁靚嘅景同仔仔可以瘋狂自拍啦。

巴士一到記得唔好第一時間就趕住入水族館，一定要去睇咗海豚表現先！係免費架，個人認為正係睇呢個已經值回票價，因為真係好精彩，通常巴士團都會好貼心，到達時間都會係表演前十分鐘到達，不過以防萬一，報巴士團之前先check一下我上面個時間表。

海豚聽到自己個名，會自己上台同觀眾Say Hi，不過今次都長知識了，原來海豚把聲係好尖嘅。

海豚仲可以跳到成層樓咁高，好犀利！題外話，大家要做個好遊客，入到水族館又好，影海豚又好，唔好開閃光燈影相。

睇完表演就可以直入主題去水族館啦！巴士團已經包埋門票所以真係好抵玩，一入到去就會見到一個觸摸池，大家可以摸下海星同海參，一軟一硬。切記唔好太大力，整傷佢地就唔好啦，日本人就出名周到，係觸摸池隔離就有洗手嘅地方，所以盡請比仔女探索啦！

館內有各式各樣嘅珊瑚、奇形怪狀嘅魚同水母龍蝦，佢地d魚缸做得好好，水清之餘都佈置到好似真實嘅海洋環境咁！我send咗少少相比朋友睇話我去咗潛水都有人信。

重頭戲！超巨型魔鬼魚同鯨鯊，真係睇到哇一聲，係你面前遊過果種震撼真係筆墨都難以形容。

大家仲可以搭電梯去水族館四樓，由頂部望落個魚缸到，都係一個唔錯嘅體驗。

比較特別嘅係，有個小平台位係用玻璃做底比你望落去個魚缸到，但係唔好太期待，因為係睇得唔清楚嘅！不過都幾好玩。

通常巴士團都會比兩至三個鐘大家行，不過小編係個鍾意瘋狂影相嘅人，覺得時間都係啱啱好夠用。如果你地真係有時間多，有個好消息要話比大家聽，就係水族館附近有個超大繩網陣，我強調係超大，超好玩！

離開水族館，大約半個鐘車程，就可以去到另一個必去景點！嚟緊想去沖繩嘅你地一定要睇。

睇下一篇：日本版萬里長城 沖繩必去今歸仁城跡