【Iphone注意】女兒偷借媽咪指紋 網購$2000聖誕禮物

呢位六歲嘅小朋友Ashlynd Howell人細鬼大，見媽咪瞓著就拎佢電話，再用媽咪姆指指紋成功解鎖！仲一口氣買咗13件自己最鍾意嘅Pokémon玩具。

唔知情嘅媽咪第二日先知道自己Account無啦啦多咗13項購買紀錄，第一反應就係以為自己比人Hack，好彩佢多口問句囡囡知唔知咩事，Ashlynd Howell就話：「Yeah！I was shopping.」

最後，13樣玩具退得返嘅得四件，當係今年特別d啦！

其實自從Iphone有指紋解鎖之後，呢類新聞都不時發生，解決方法就係人都知，不過係到都長氣少少重溫一次：

1.唔採用指紋解鎖

雖然真係好方便，但為咗保住荷包放棄都要架啦！不過要注意，轉返用傳統四位數字定係畫圖案解鎖都好，都唔好再比仔女知啦。

2.設定不綁定信用卡

大家絕對唔好再貪方使綁死自己信用卡啦，以App Store嚟做例子，唔想仔女瘋狂幫你買遊戲或者係遊戲內課金，其實簡單幾步就得。

係App Store精選到拉落最底，撳返自己個ID，然後輸入密碼。

查看付款資訊。

最後揀返「無」就大功告成，咁就無有怕啦！絕大部分App做法都係大同小異，家長不妨修改一下設定保障自己。