【中秋系列】2016「靚款VS伏款」燈籠大檢閱

年紀較小的小朋友玩Led燈的塑膠燈籠較安全，而且款式選擇多。不過近日更有報道指不少卡通款燈籠有侵犯版權之嫌，選購時真的要特別小心。記者近日就走訪旺角花園街及一田百貨，搜羅今年最新燈籠！

第一站先去旺角花園街，整條街有多家玩具店及路邊檔，中秋將至，多家店舖都已推出大量燈籠。以下就同大家睇下2016燈籠有咩新選擇啦！

Angry Birds電燈籠設計小巧，最特別的是其丫叉樹枝的設計，不過燈籠是否有購版權則成疑。

呢款蓮花燈...嗯...你哋覺得點？售價$48

七彩八爪魚，啟動時閃燈有音樂、啲爪會上下郁，現場有啲公公婆婆好欣賞，我自己就覺得好恐怖！售價$48

不過講到驚嚇，呢個一睇就知係老翻嘅「Mickey & Friends走馬燈」先係暫時見過嘅「今年之最(伏)燈籠」！

個螢光粉紅頭米奇面目模糊咁「轉出嚟」果下真係個心都離一離！售價$48

上面幾款太激動，所以轉往另一家玩具店，呢間玩具店嘅紙燈籠就正常好多喇。

其中呢款熱氣球紙燈籠真係好靚呀，多色選擇，大Size售$28、細Size售$20。本人買咗紅色細Size！

再睇埋路邊攤檔嘅燈籠店啦，呢款中秋花燈夠晒傳統，好似酒樓吊住果啲咁，超好笑。售價$25

要買傳統的白兔、金魚燈籠，就要去紙紥舖喇！

最傳統的玻璃紙楊桃燈籠、彩色及純白色的白兔燈籠都有。售價數十至數百不等。

去完花園街，第二站就到一田百貨。百貨公司的燈籠價錢較高，但不怕有侵權產品，而且品質會較有保證。

 Hello Kitty紙燈籠好精美。

小楊桃及小星星燈籠。

呢款豹皮玉兔燈籠好潮呀，售價$55

金魚紙燈籠售價$69

仿剪紙設計玉兔燈籠售價$45