【長腿爸爸】考慮帶埋細路移民？熱門國家有原因

BillyCool身邊都一啲朋友嘅細路仔仲細，近期圍埋一齊嘅時候，已經唔只講買工廈、買股票，大家都諗緊將來要送小朋友去邊度讀書同移民。估唔到喺1989年嘅30年之後，香港今日又再出現移民潮。

其實來來去去，大家討論嘅都係嗰幾個地方──英、美、加、澳、新加坡或者台灣。BillyCool嘅大囝同二囝都喺外國讀書，當初幫佢哋揀地方出國，都有考慮過唔同地方嘅教育模式，最後就因應囝囝嘅喜好做選擇。如果講教育，其實BillyCool會覺得新加坡都幾有系統，因為身邊唔少新加坡人俾我嘅感覺都好優秀，而國際社會普遍對新加坡人嘅評價亦好正面。

就喺最近，BillyCool有單生意需要同外國公司交易，搵咗一位年輕女ibanker幫手，佢係新加坡人，未坐埋位做嘢，已經聽到佢一口native水平嘅兩文三語，用流利嘅英文、國語、廣東話應付唔同客人，言談間好自然咁流露出自信。我平日見到嘅香港或內地年輕人，通常都會戰戰兢兢咁同你打交道，英文亦唔係個個可以充滿自信咁講。呢位新加坡ibanker就唔同，佢嘅表現即時留低一個好深刻印象。最記得係啱啱同佢接洽時，佢頭幾句已經直接問：「How big is the deal?」佢咁樣一問，我第一個反應係話晒都係客吖，咁直接問人單生意金額幾大，係咪有啲睇唔起人？不過，同佢傾多幾句就發現，原來佢只係做事清脆利落，想好有效率咁幫手完成呢單deal，結果喺佢一口流利語文幫助之下，一切妥妥當當咁完成。

點解佢哋可以咁有自信？原來新加坡係目前亞洲裡面最精通英文嘅國家，新加坡獨立後，李光耀政府保留英文做主要語言，因為佢認為呢個係最合乎經濟效益嘅做法，可以同全世界接軌。另外，李光耀政府亦都大力推廣華語，於是到中國經濟崛起，新加坡人又可以受惠。新加坡推行兩語教育政策，以第一語言學習英文，「母語」可以係華語、馬來語、坦米爾語，無論中、小學生都要學習第二語言（英語），加上新加坡教育體制同英國、加拿大、澳洲等英聯邦國家相通，所以年輕人好容易去外國深造。

大多數新加坡人都擅長英文同華語，呢個絕對係佢哋嘅優勢。政治上，李光耀係一個獨裁者，用強權管治新加坡，壓制到所有反對佢嘅人都貼貼服服，呢方面國際間並不欣賞。但無可否認，新加坡人有今時今日嘅國際地位同語言能力，李光耀都係背後最大推手，令到新加坡人嘅水平得以提高。

作者：長腿爸爸Billy Cool（Facebook專頁按此）
　　　人稱工廈界Cool魔，十幾年前買入第一個工廈單位，賺到第一桶金，從此改變對財富嘅睇法：有生意當然要繼續做，但想賺大錢就要有準確嘅投資角度！