【小胖阿七】為環保轉揸電動車？香港好難搵位充電

阿七揸咗咁多年車，一直都好想盡番一分力環保啲，轉用電動車，唔係因為電動車有稅務優惠，而係真心想減少啲污染，等空氣清新啲，電動車係有效減少路面懸浮粒子嘅方法。有小朋友就更加會注意呢樣嘢，大家都想為下一代出一分力。

阿七花咗啲時間去研究，結論係：自己無條件用電動車！甚至可以大膽講，香港大部分駕駛者都無條件轉用電動車。首先，充電就係一大問題，公共電動車充電設施，截至今年6月底，全香港有2,308個公用充電器，但喺香港登記嘅電動車已經過萬架，即係平均5架車分享一個公共充電設施！更嚴重嘅係，有啲仲要係中、慢速，即係要花6至8個鐘先充滿電！而且大部分喺港島同九龍，新界就少啲。阿七有朋友揸電動車，成日要出入荃灣，佢就話有時無電，就會去熊貓酒店嗰邊充電，通常排隊都要半粒鐘，充電又要半粒鐘。嘩！趕起時間嚟，點搞呢？

出去搵位充電已經夠麻煩，最大件事係喺屋企停車場都無得充電！聽聞一啲新樓盤停車場會有充電位，但係阿七係住舊屋苑呢，所以就無福消受。阿七問過管理處，問吓可唔可以加番個電掣，管理處一句就話：「大廈公契唔俾喎，如果要改公契，你要聯絡業主立案法團去傾啦。」咁阿七都無咁容易放棄，所以走去問過律師朋友。

律師朋友話：「香港物業的確係好跟公契，要其他業主同意，再搵律師先改得。」

「咁無咩可能啦，又唔係個個揸車，揸電動車嘅人又唔多，其他業主點會理你？」

單係充電已經咁大問題，仲有維修又係一個問題，因為電動車同引擎車唔同，唔係普通車房可以維修到，需要有機械工程、電力同電子工程等知識，於是有壞就要靠原廠維修，維修保養費都貴啲。

其實，香港都算係個發達嘅城市，但係喺環保政策方面，就真係落後咗啲，政府係有能力去推動環保政策，而阿七亦相信，推廣電動車嘅政策係無咩爭議，因為電能車喺全世界都係一個大趨勢，遲早都普及，早啲做好準備仲好啦。

當然，最環保梗係多啲用公共交通工具。揸車無疑係比較方便，尤其是對有小朋友嘅家長。不過，如果有時間地點又唔難去，阿七都會向小朋友提議：不如一齊搭巴士、港鐵。一齊搭車，可以專心同小朋友講解四周圍嘅事物，係一個好難得嘅親子機會。嘅然未有完善嘅充電配套，阿七想盡一分力做環保，就要靠減少啲揸車喇。

作者：小胖阿七（Facebook專頁按此）
　　　本地保險業界先驅，40年前入行的首批從業員，見證無數高低起落，由高峰期的月入20萬的中環人，到突然要由零開始call單儲客，唔介意分享經驗，最緊要你哋聽完有錢落袋。