【小胖阿七】跌倒最緊要識起返身　仲記唔記得衛詩故事？

星期日揸車接送阿仔去課外活動，同平日一樣，同阿仔一齊聽電台，有時又討論節目內容，今次係歌手衛詩接受電台訪問，一講起，佢10年前因為吸毒事件而離開樂壇一段長日子，10年前嘅事，阿囝應該唔多識佢卦。

「阿囝你識唔識佢？」

「識呀，佢孖生家姐咪係衛蘭。」

「衛詩消聲匿跡咁多年，咁你都識，咁勁。」

「佢家姐都一直有演出，所以啲人仲會記得佢呀。」

「諗番起10年前，佢咁後生，真係大好前程，點知走去吸毒，一剎那真係咩都無哂。」

「好彩都可以起返身。」

「跌倒都唔緊要，最重要係識起返身。」

我哋一齊聽住收音機中佢講自己最低迷嘅日子，知道佢自此有返教會，拍過福音電影，為教會服務，反思過往嘅錯，慢慢就企返起身，宜家再次重新出發。

「嗯，有好好反思同改過，都係難得嘅，不過最好就一早唔使跌得咁傷，阿囝你覺得有咩方法可以令自己唔好錯得咁嚴重。」一齊做個案討論，係非常好嘅親子教育，阿七又點會唔把握呢？

「我覺得要感恩，好似佢講到當年因為喺娛樂圈好大壓力，所以一時抵唔住誘惑而吸毒，但係佢後嚟去非洲探訪，佢自己都識講當地人生活條件好差，自覺自己好舒服，呢個時候佢就識感恩啦。如果喺10年前，佢識得感恩可以同家姐一齊努力，又有公司去捧佢，佢就唔會咁唔識自愛。」

「講得好好呀！」當然啦，阿七喺阿囝細細個開始就同佢討論故事，一齊諗吓有咩教育意義，所以訓練到佢有分析能力，阿七成日話寧願睇多啲人點樣跌，好過自己傻更更跌死。

再問下阿囝：「咁你覺得佢宜家值唔值得得到鼓勵？」

「都值嘅，宜家聽落都幾誠懇，相信佢都真係知錯，不過如果佢日後再次犯同一錯誤嘅話，就一定會令人好失望。」

「所以真係希望佢好好珍惜宜家擁有嘅一切。」

啱啱好到達目的地，阿囝落車時，除咗好有禮貌咁同阿七講：「唔該Daddy。」仲加多一句「I love you, Daddy」嘩！Sweet到呢，阿囝學嘢真係快到呢！阿七都快快回應：「I love you, too」。

其實，真係要成日有個感恩嘅心，因為世事難料，幸福唔係必然，東方人係比較含蓄，但係都要好好向親人表達愛與支持，當家庭成員遇到啲咩困難時，就會主動去求助，而減少鑽牛角尖嘅情況。

作者：小胖阿七（Facebook專頁按此）
本地保險業界先驅，40年前入行的首批從業員，見證無數高低起落，由高峰期的月入20萬的中環人，到突然要由零開始call單儲客，唔介意分享經驗，最緊要你哋聽完有錢落袋。

圖片來源：Jill Vidal 衛詩 Facebook