【長腿爸爸】超人一句惹毛中央？同阿女講「宰相肚裡能撐船」故事

星期日晚上，上網看著新聞，看著看著，心裡諗起一句話，就喺呢個時候，見到阿女仲未瞓。

「阿女，聽日要返學喎，快啲去瞓啦。」

「爸爸不如講故仔俾我聽呀！」

一定係呢兩日玩得太hyper，又會無啦啦要阿爸講故仔，其實喺阿女識得自己睇書後，我哋真係少咗講故仔俾阿女聽，好啦，阿爸都好珍惜呢啲咁sweet嘅親子時刻。

「好啦，你乖乖去鋪好張床先。」

見阿女自己冚好被，阿爸就決定講呢一個故仔。

「今日爸爸講個故仔，係關於古時一個老宰相，呢個宰相好老啦，點知娶咗個18歲如花似玉嘅女仔。呢位後生妾侍同老宰相年紀相差太遠，所以妾侍都好唔開心。有一日，佢去花園賞花，就遇到一個年輕帥氣嘅家廚，兩個人傾得好開心，仲鍾意咗對方。之後，佢就成日偷偷去花園同家廚相會。有一次，佢就話好想多啲時間相會，所以諗到一個方法，原來呢，老宰相好擔心自己遲起身上朝，所以養咗隻雀仔每日五更就叫，隻雀一叫，老宰相就會出門口，妾侍提議喺四更之前，家廚就去用竹篤隻雀，咁老宰相咪會早咗出門口，咁佢哋咪可以見耐啲囉。」

「嘩，靠隻雀，好彩我有鬧鐘啫。」

「佢哋係古人嘛，之後一日，老宰相聽到隻雀叫，咪去出門啦，點知就聽到有人鼓更，先係四更，老宰相就返轉頭，發現咗真相啦。」

「嘩，咁嗰兩人死硬啦。」

「老宰相無出聲，照樣出去先，之後到中秋啦。」

「賞月、食月餅、玩燈籠！」

「古人賞月，會作下詩嘅。老宰相就叫咗妾侍同家廚出嚟，老宰相作詩話：『中秋之夜月當空，朝鳥不叫竹桿捅，花枝落到粉團上，老薑躲在門外聽。』家廚一聽，就知死啦，就跪低，作詩話：『八月中秋月兒圓，小廚知罪跪桌前，大人不把小人怪，宰相肚裡能撐船。』妾侍都知衰，同老宰相認錯。老宰相笑一笑，覺得自己同妾侍年紀相差好多，就叫佢哋兩個離開相府成親啦。所以，流傳咗『宰相肚裡能撐船』呢一句。」

「嗯，兩人都好彩，遇到咁大方嘅老宰相。」

「你覺得老宰相值唔值得欣賞？」

「值得，因為佢咁大量，對人都好仁慈。」

「呢啲叫心胸，成功嘅人就係好有心胸，唔會斤斤計較。好啦，故仔講完啦，你要瞓啦，晚安。」

阿女瞓咗，諗返起日前睇嘅一單新聞，話李嘉誠喺寺裡面講話「希望年輕人體諒大局，執政者都能夠對未來主人翁網開一面」。講真，我就覺得呢段說話屬中性，想兩邊互相體諒，不過後來都引來政法委批評，仲話佢縱容犯罪，又囤積土地令「年輕人把房價高、租金貴的不滿發洩到政府頭上」。李生回應「遺憾，多年已習慣莫須有的指責，永遠會虛心接受批評」，不失溫和有智慧。

香港樓價高企又點可能係一個人嘅問題，發展商當然係其中一個原因，但政府亦唔可以推卸責任，有一段時間停建公屋、居屋，又唔處理棕地問題，香港係自由巿場，內地人買香港樓推高樓巿，呢個亦係唔可以否定嘅事實。至於李先生，多年嚟喺內地捐錢起學校做慈善，大大話話都億億聲，唔通就因為一個言論全盤被推翻，仲要勞動到咁高層次嘅內地機關去批評？我心裡面即時諗到嘅，就係呢句「宰相肚裡能撐船」。

作者：長腿爸爸Billy Cool
　　　人稱工廈界Cool魔，十幾年前買入第一個工廈單位，賺到第一桶金，從此改變對財富嘅睇法：有生意當然要繼續做，但想賺大錢就要有準確嘅投資角度！