【小胖阿七】走得快好世界 為小朋友著想一定要走資？

最近，有個客份保險plan到期，可以拎番200幾萬，所以阿七搵佢去簽文件，順便了解佢需唔需要其他plan，一問之下，佢就話：「唔需要啦，我而家一有保險、定期到期，就搬啲錢去外國。」

「移民？」

「移唔移都好啦，錢都要搬走架啦。」

「嗯，呢排好多朋友係咁調走資金，都係信心問題？」

「好明顯啦，對成個政府都無信心，一個問題都可以拖咁耐，一早處理咪無事囉。」

見個客一臉不滿，似乎要大爆發，都係轉話題：「咁你轉啲錢去邊？」

「英國呀，其實都好方便，唔使專登飛去英國開戶口，一般香港大銀行都開到離岸戶口，有好多國家可以選擇，不過最common都係美國、英國、加拿大、新加坡嗰啲啦。」

「你點解揀英國呢？」

「無嘅，反正想送個仔過去讀書，都唔排除一家人將來移民過去。話時話，通常夠100萬港紙都可以開離岸戶口，你有無考慮吓？」

「我會嘅，學你話齋，我都60幾歲人，天跌落嚟都唔驚，但係我個仔得十幾歲，佢仲有大把日子要過，就算我唔理我自己，我都要幫佢安排一吓啦。」

「話又唔係咁講，我哋有能力當然要幫下一代，但係我哋自己都要搵定後路，辛辛苦苦捱過半世，想享吓福都應該呀，你都唔想一鋪清袋吖？」

個客呢幾句真係好觸動到阿七，阿七到60幾歲就俾服務咗40年嘅公司逼走咗，本嚟月月20萬收入就成泡影……阿七已經衰咗一次，而家重新建立緊嘅嘢，阿七點會想再次失去？

個客繼續講：「你睇吓呀，馬雲咁有錢都要『被退休』，李嘉誠捐咗咁多錢俾大陸又點呀？講句嘢都俾官媒鬧！而家收到風，央企要控制香港公司同資產，一個『莫須有』罪名就可以搶奪咗啲商人嘅功勞。做有錢佬都做得咁唔暢快，超級富豪都咁無奈，何況我哋呢啲得少少錢嘅？我啲朋友都係話走得就走。」

「嗯嗯，理解嘅，大家都係想搵一個地方係會保障到自己嘅資產。」

真係好感慨，一個地方應該要吸引資金，多年來因為香港嘅獨特歷史背景，因為得到國際認可，先會吸引外資，但係而家？當政府政策一次又一次違反國際標準，就漸漸失去國際認可，不但外資會走，本地投資一樣會走。走咗嘅資金好少會返嚟，於是大家只會越來越無信心，陷入惡性循環之中。作為小小市民，只能盼望政府做正確決定，再次令國際有信心。

作者：小胖阿七
　　　本地保險業界先驅，40年前入行的首批從業員，見證無數高低起落，由高峰期的月入20萬的中環人，到突然要由零開始call單儲客，唔介意分享經驗，最緊要你哋聽完有錢落袋。