【長腿爸爸】中日孩子大不同 一程JR就睇出身教

有朋友叫Billy Cool一齊去日本大板睇樓，Billy就唔太熟日本樓巿，但就見係暑假，順便帶埋老婆同細囡去日本，當去個小旅行。

原來日本樓幾抵玩，一百幾十萬港紙都有交易。朋友睇中一個150幾萬民宿，佢話香港樓咁貴，根本買唔到，做生意又怕租貴，不如諗下將筆錢買間日本民宿，原來可以委託民宿管理公司，按出租收入分紅，業主可以收75%，25%就俾管理公司，回報唔錯，又唔困身。佢仲話將來去大阪玩，可以住喺自己嘅民宿，聽到都覺得型。

不過，Billy Cool始終唔太熟悉日本房地產，所以望完就算，之後就帶老婆同細囡去玩。我哋搭JR去大阪兒童樂園，呢個係個唔錯嘅親子景點，可以玩成大半日。

成個行程最令Billy Cool感觸嘅係搭JR離開嗰時嘅所見所聞。由於大部份人都係由兒童樂園返出嚟，同車上都有唔少小朋友，阿囡玩到攰，挨住媽咪瞓咗。但係，唔知點解仲有個小朋友好hyper，成個人跳咗上座椅上面，跳嚟跳去，仲要大吵大鬧！所有人為之側目，諗住佢父母會好快阻止佢啦，點知個阿爸掛住篤手機，阿媽就同一個老人家大大聲傾偈。好遺憾地，Billy聽得明佢哋講咩，因為佢哋講普通話……

同一時間，Billy Cool留意到遠處有日本人帶住小朋友，真係有天淵之別，啲日本小朋友好乖咁坐定定，好安靜。去過日本旅遊都有留意到呢個情況，日本小朋友永遠好似個小紳士，唔會隨意哭鬧，又唔會周圍搗亂。呢個真係同佢哋由細到大嘅德育有好大關係。日本人坐JR總係靜靜地，連電話都唔會講，只會send短訊、睇報導，就算遇到嚴重天災，要去排隊拎物資，個個都係靜靜排，一句怨言都無。

相比之下，嗰位小朋友就真係名副其實嘅「三大」──聲大、動作大、脾氣大。但又無辦法，因為大人一樣咁嘈，小朋友梗係有樣學樣。當大人長時間表現得好似世界要圍住佢哋轉嘅時候，又點可以期望小朋友會係小紳士呢？上網睇片見過有人為買手袋不惜拉住個大喼推人撞人、食自助餐又大碟大碟咁掃，嗰一刻，呢啲畫面就喺我腦海浮晒出嚟。

望住小朋友係咁嘈，真係好尷尬，Billy Cool都識講幾句普通話，諗緊好唔好「溫馨提示」佢哋，入鄉隨俗唔好咁嘈，但係又有少少淆底，唔知會唔會引起更大紛爭……心裡面糾結咗一陣，Billy Cool都係決定龜縮唔出聲，乜都唔講做好自己本份先。之前聽有個斯斯文文嘅朋友講，出去旅行曾經俾人誤以為日本人。老土啲講句，人哋唔會因為你係咩人而歧視你，只會因為你嘅行為而睇你唔起。

作者：長腿爸爸Billy Cool
　　　人稱工廈界Cool魔，十幾年前買入第一個工廈單位，賺到第一桶金，從此改變對財富嘅睇法：有生意當然要繼續做，但想賺大錢就要有準確嘅投資角度！