【長腿爸爸】土地問題惹禍　正苦謀殺咗幾多生命

最近又有龍床盤開售，平日買開工廈嘅Billy Cool當然冇興趣，見佢最細得128呎，細絕全港，講真，有能力邊個想住咁細，就算買嚟投資都揀第啲。

點解呢個龍床盤特別引起Billy Cool留意？因為其中有20個咁細嘅單位，入場門檻低到200萬，呢個價近年都絕跡，有都留番俾啲真正有需要人士買，唔通仲學呀港姐咁買嚟炒咩。

其實，真係有人好需要呢啲盤……

話說近日，有朋友搵Billy Cool傾偈，係一對30歲左右嘅夫婦，佢哋做普通文職，結婚幾年各自住喺原生家庭，唔太好彩嘅係佢哋收入唔多，一直努力儲錢，就一直望住樓價升，追都追唔切，所以買唔到樓。好彩嘅係佢哋嘅父母都好好，無要求佢哋走之餘，仲成日留埋飯俾佢哋帶飯返工食，等佢哋儲多啲錢。

唔怪之得游蕙禎話：「就算我哋而家想去X嘢，都搵唔到房X呀。」

就連呢對結婚幾年嘅夫婦都無得住埋一齊，X嘢機會自然少，何況係普通拖友呢？

呢對夫婦都有需要，間中會平平地去下旅行，不過最近一次中咗頭獎，就有咗佢哋嘅愛情結晶品，當Billy Cool聽到呢度，就立即講聲：「恭喜呀！」

點知個太太眼濕濕咁講：「我哋諗緊好唔好唔要……」

「吓！」Billy Cool一直以為佢哋係嚟問買樓建議，點解變咗咁？生命嚟㗎！點可以隨便就話唔要？作為3個小朋友嘅爸爸，Billy Cool心裡好激動，但對住呢對年輕朋友，好努力冷靜返咁發問同阻止：「點解呀？唔鍾意小朋友？小朋友好得意㗎。」

「我哋鍾意小朋友呀，不過……」

「經濟問題？可以試吓講出嚟喎。」

「如果係一個小朋友，我哋都勉強照顧得到，但係而家驗到係孖胎，咁就失晒預算，屋企仲邊度夠位住，就算老人家肯幫手湊，又點湊兩個呢？我哋真係唔知點算。」

丈夫講完，太太就開始喊住咁講：「我都唔想㗎，係兩條生命呀！係我哋嘅BB嚟㗎！我驚呢一世會受良心責備……」

丈夫都流下男兒淚，搞到Billy Cool都想喊，佢哋明顯失晒方寸，所以Billy Cool一定要更加冷靜。

「不如咁，我哋一齊計吓數先，你哋介唔介意講有幾多儲蓄同收入？」

「都講咗咁多唔怕講埋啦，我月入19,500，銀行有20萬左右，太太月入11,000，銀行有8萬左右。」

Billy Cool當下就諗起啱啱睇過嘅「龍床盤」，最平嘅單位低於200萬！

「嗰個新盤，你哋有無聽過？」

「聽新聞講，細到剩係放落一張床？」

「就係嗰個，你哋一定諗咁細點夠一家四口住，係唔係？不過唔好抗拒住先，都了解吓如果要買，會係咩情況。就當個單位200萬啦，借九成嘅話，要俾20萬首期，你哋係夠嘅。之後月供大概7,000幾蚊，如果你哋自己出去租，7,000幾蚊都租唔到夠大嘅單位，但係呢個細單位係你哋自己嘅物業，唔升值都至少保值。小朋友頭幾年又唔會佔好多位，咪喺呢幾年再諗吓點樣去增加收入，至少可以見步行步先。」

見佢哋個樣，係有認真諗緊，過咗一陣，個男嘅就提出問題：「雖然7,000蚊供樓比租樓仲抵，但係兩個小朋友開支都好大，仲有唔知湊唔湊到兩個。如果層樓之後唔升值，又如果我哋之後收入無增加……」

「咁兩個小朋友呢，就一定有啲開支，但又唔好咁驚，譬如可以睇政府醫生、讀免費幼稚園、參加免費活動、自己DIY玩具、上網搵平價二手嘢等，最重要係父母對小朋友多啲關懷同愛心，陪佢哋玩，好過單純俾物質。諗返起，我第一個小朋友出世時，家庭經濟都唔係好好，雖然係叫做老闆，但試過唔夠現金出糧俾同事，偷偷做炒散，去搵錢出糧俾同事。咁又唔代表唔開心，我同老婆一有時間就帶小朋友去郊野公園、沙灘玩，唔使點用錢，小朋友都可以有個快樂童年。」

佢哋點一點頭，見佢哋都buy buy地Billy Cool，咁就繼續講：「我估你哋未同兩邊長輩傾，係未？」

「梗係啦，都唔知應唔應該生落嚟，點敢同老人家講？」

「我建議你哋坦誠同佢哋傾下先，或者佢哋好想幫手湊孫呢。至於層樓升唔升值都唔緊要，我問你哋呀，係咪覺得有機會大跌市？」

「又應該唔會，個個都想有樓，仲有咁多人炒樓。」

「係囉，呢個投資都應該穩陣呀，就算唔升都唔跌呀，你哋唔使咁擔心。至於收入方面，都要靠自己多啲留意身邊嘅機會，我就覺得又唔使咁悲觀，如果你哋日後仲想同我傾吓點搵錢，都好歡迎㗎，我就相信一定有方法。」

Billy Cool當日已經盡力令佢哋對前景有返少少信心，之後都有send啲正面短訊俾佢哋，好想阻撓到佢哋，希望下年見到兩個可愛BB出世，Billy Cool真係盡咗力。喺得到佢哋確認回覆前，Billy Cool一直問點解：點解呢個正苦搞到香港人咁慘？點解唔大量興建公屋同居屋，令市民可以安居樂業？明明就有1,030公頃棕地未納入規劃，遲遲都唔處理，反而話要花6,000幾億去填海！6,000幾億可以買回好多未好好規劃同可使用嘅土地啦！再加埋落個醫療、教育資源同老人福利都得呀！好做唔做，走去倒錢落海！

幾日之後，Billy Cool收到朋友電話：「我哋最後買咗嗰個新盤啦，細就係細啲，但都叫係我哋一個小空間啦。同4位老人家傾完，佢哋協調咗將來輪流過嚟照顧小朋友，有屋企人支持，我哋個心都定啲。」

謝天謝地！成功保住呢兩個小生命，不過唔知咁多年嚟，正苦失衡嘅政策謀殺咗幾多生命呢？明明可以出世嘅小生命，竟然因為社會問題而失去生存嘅機會，真係好可悲。

作者：長腿爸爸Billy Cool
　　　人稱工廈界Cool魔，十幾年前買入第一個工廈單位，賺到第一桶金，從此改變對財富嘅睇法：有生意當然要繼續做，但想賺大錢就要有準確嘅投資角度！