【小胖阿七】我永遠記得靈堂上 個男仔好哀怨望住我

近日諸事不順，今晚更加係喺靈堂度過，呢度唔係一般嘅凍，而係陰陰寒寒，間唔中聽到低泣喊聲，最令阿七崩潰嘅係一個10歲嘅男仔，眼紅紅咁望住我，當我同佢講：「請你好好保重」時，佢哀怨咁問：「點解你唔幫我媽咪？」

阿七都有細路，有時睇新聞見啲意外，都會想像小朋友冇咗爸爸媽媽，一定傷心欲絕，但估唔到當自己要面對一個啱啱失去媽媽嘅小朋友，竟然會啞口無言唔識回應，唔通我用自己多年做保險嘅工作經驗、保險理論、知識同佢解釋咩，何況解釋根本冇用，可以安撫到呢個男仔嗎？可以令佢開心返嗎？可以令佢媽咪返嚟嗎？如果都唔可以，我仲講咁多做乜？嗰一刻我唯有輕輕攬一攬佢，佢一齊喊，一齊悼念佢媽咪。

佢媽咪係個年輕女士，今年先39歲，正值壯年，係兩子之母，有個好錫佢嘅老公，本嚟就好幸福，點知舊年……佢確診有乳癌，仲要已經係4期，已擴散至腦。醫生建議佢接受化療，但係當佢打第一針化療，已經好辛苦，身體好快轉差，直到最近收到佢嘅死訊。

佢本身係我舊舖嘅一個女下屬嘅客，大概喺9年前跟我個前下屬買咗危疾保，不過我個前下屬做咗一年左右就轉咗行，我就接晒佢啲單，都有約過晒佢啲客出嚟認識吓。後來佢仲搵咗我幫佢兩個仔仔搞埋儲蓄保同醫療保，所以我都見過佢哋一家人好幾次。

後來我俾舊舖逼走，無辦法再直接跟呢堆舊單，不過我同啲客承諾過：有啲咩，我都好樂意幫手。

就喺舊年，佢就call我，同我講佢個壞消息。我立即幫佢聯絡舊舖拎齊表格，幫佢填咗部份表格，跟住叫佢搵醫院申領醫療報告，同搵醫生寫清楚佢嘅情況。舊舖啲保險計劃，我都賣咗咁多年，已經好熟悉，呢種已擴散嘅癌症，應該可以claim足100%。而佢當日係買咗60萬嘅危疾。

「阿七，其實喺公立醫院嘅醫療費都唔係好貴，主要係啲化療藥貴少少，我先生都負擔得到。不過呢筆60萬真係好重要，除咗西醫，我都好想試吓中醫，有個朋友介紹個出名醫師，都唔平架，我諗住用晒呢60萬去試，我真係唔想死，我仲要睇住我兩個仔大個，我亦都唔想掉低我老公，佢一個男人點識照顧兩個仔？」

諗返起佢咁同我講，心都酸埋……當時，我仲安慰佢：「放心啦，文件齊晒又填好晒，宜家等保險公司claim錢就得。你就可以中西醫兩邊都睇，要好好照顧好身體。」

講真，阿七見過唔少個案，總結都係覺得西醫治癌最可靠，不過以中藥或一些自然療法輔助都未嘗不可，最重要係令患者心理有依靠，更有信心抗癌，抗癌一大重點正正就係要有堅強意志。所以，每當聽到癌症患者講佢哋相信咩治療方法，只要唔係超錯，同埋肯繼續正統療治，阿七都會贊同佢哋去試。

點都好，只希望嗰60萬快啲批到出嚟，俾佢安安樂樂咁用就好，點知……

我收到佢電話，係喊住咁講：「保險公司唔批呀！點解會唔批？我唔明呀！我都咁嚴重啦！」

「冷靜啲先，保險公司係有回信？你影俾我睇先，我要睇咗先知咩事。」

一睇，大鑊！真係大大鑊！梗係claim唔到啦……

原來喺9年前，佢買呢份危疾保時，填寫過往醫療記錄時漏報咗……佢25歲時被發現有子宮內膜異位症，當時不用做手術，只需要定期檢查。呢個就係俗稱嘅「朱古力瘤」，係好common嘅婦科病，每10個喺生育年齡嘅婦女之中，就有1個患上。

保險合約係有「最高誠信」原則，投保人有必要向承保人披露相關重要事實，例如病歷。因為披露重要事實會影響核保結果，例如加loading與加不保事項，甚至拒保，自然會影響到日後能否成功理賠。

所以，阿七一定會多返提客人填清楚，有時如果分唔清係咪重要事實，寧願多填多寫，好過日後影響claim錢。買保險都係想喺有需要時可以用到。

阿七同佢解釋咗，佢好似明，但係佢好down，以為會到手嘅60萬……佢無咩講嘢，之後嗰幾個月，阿七都有send短訊去問候佢，佢都有回覆吓，但係之後就係得知佢離開咗。

阿七覺得好難受，雖然唔係我直接賣呢張單俾佢，我都唔敢話係咪前下屬做得唔夠好，而且多咗呢60萬都唔等於可以醫得好佢，不過份保單無辦法令佢開心少少，甚至令佢有唔開心，呢一吓已經令我好難受，只係唔希望再有人因為呢個情況claim唔到錢。

保險係一份合約，一定要睇清楚合約條款，填文件一刻已經要打醒十二份精神，有疑問就要問。而agent們，大家都有考牌，年年都要上夠課堂時數去續牌，唔好話你唔識！唔該做足晒，千叮萬囑啲客報齊資料！我真係唔想再次喺靈堂俾個小朋友問：「點解你唔幫我媽咪？」呢啲根本係可以避免！

作者：小胖阿七
　　　本地保險業界先驅，40年前入行的首批從業員，見證無數高低起落，由高峰期的月入20萬的中環人，到突然要由零開始call單儲客，唔介意分享經驗，最緊要你哋聽完有錢落袋。