【小胖阿七】我要聽後生仔女心聲 唔想被時代淘汰！

同事笑笑口咁講，好似喺度落井下石，不過，我忍！我都知我估算錯誤，上星期interview咗十幾個大學畢業生，估唔到全部reject我個免費pre-job training，我本身都無諗過100%入行，但一直信奉大數法則，十幾個interview，總有一個半個會肯上pre-job training啩，明明我透露會offer底薪，點知……唉！
「你哋要用房？咁我出去㗎啦……」
之後見到隔離條team浩浩蕩蕩入去開會，我就孤苦伶仃出去反思，究竟出咗咩問題。
對於build team，阿七實在唔太熟悉，因為過往我都是掛住自己跑數，曾幾何時自己啲客都夠我每月有20萬佣金，但自從舊舖俾香港富豪收購咗，我就俾人逼走，剎那間無晒啲單。馬死落地行，我就轉咗去馬先生收購嗰間保險公司，自己努力跑數之餘，都想build返條team，既可傳承多年銷售經驗，亦可穩固自己位置，我唔想再成為公司嘅棄將！

於是我同間recruitment agency合作，佢哋幫我約咗15個畢業生上嚟interview，就喺上星期見晒。回想嗰15個後生仔女幾好禮貌，有幾個仲好smart，有幾個就比較靜，不過對答都正正常常。阿七問吓問題，fact find之後，就盡量build trust同create need，再大力分享行業前景、如何建立自己事業等。

自問都講得唔錯，唔通而家啲小朋友唔buy呢套？都係唔好估估吓，我就逐一call返佢哋，直接探求原因！

打完電話之後，我沉思咗一排，只有15人嘅sample唔可以代表大部份年輕人，不過以呢個小小sample咁睇，我分呢15人為兩種人，一種是追求安穩，同佢講有機會將來有10萬人工，佢會答寧願要穩定地一、兩萬，不過就一定要準時收工、唔OT、要work-life balance，最好就唔使拋頭露面見客同受氣。明嘅，又唔係生活逼人，如果唔大貪，平平穩穩都幾好。咁呢種人，其實唔太啱做agent，佢哋多數都係俾recruitment agency氹咗過嚟，我點講都唔會說服到佢哋改變諗法，OK，我接受佢哋reject。
另一種人，係好smart、好aggressive、有膽量、想賺大錢，係幾啱入行。不過，佢哋都係reject我，點解？我感覺到佢哋唔會單純俾「利益」吸引，佢哋內心深處有更加多諗法，覺得反正都要付出時間同心血，點解要為一間公司付出，點解唔去自己創業？點解唔去追求自己夢想？為自己建立一啲實在嘅事業，唔驚輕易俾人搶走或控制。當我聽到呢種想法，我真係好佩服呢啲後生仔女，佢哋早就明白呢個道理。真係時代都唔同晒！突然覺得自己雖然有豐富銷售經驗，但而家好似唔太適應急速變化同愈來愈複雜嘅世界。我以前邊會諗咁多？做咗40年agent，到被公司逼走，先知道呢個事業可以變得唔實在。

我諗，我要再調整說服班後生仔女嘅重點，唔可能一味用「利益」吸引佢哋，可能要諗吓點樣present俾班後生仔女聽：「保險業都係一個好平台去擴闊視野、建立人際網絡同積累財富，不過呢個唔係唯一或者最終嗰個目的地，大家之後係可以，甚至同時去建立其他事業。」
之前睇時事節目，有講到Slash族，放保險從業員在其中一個Slash之後，呢個會唔會係一個selling point呢？60幾歲嘅我都喺時候放下身段，認真了解呢一代嘅年輕人，否則只會被時代淘汰。

作者：小胖阿七
　　　本地保險業界先驅，40年前入行的首批從業員，見證無數高低起落，由高峰期的月入20萬的中環人，到突然要由零開始call單儲客，唔介意分享經驗，最緊要你哋聽完有錢落袋。