【珍寶豬欄】祈個禱求上帝俾你捲土重來？

我：「睇過未？睇醫生嘅麻煩俾身分證我呀～」
佢：「未睇過，睇之前我有嘢想請教你先。」
唔好請教我啦～我咩都唔識㗎～
我：「嗯？」
佢：「我可唔可以個個星期一都嚟見你…醫生。」
你鍾意俾錢醫生嘅話冇人阻到你嘅。
我：「唔舒服要睇醫生好正常嘅。」
佢：「假設我個個星期都嚟啦，咁我突然有個星期冇嚟嘅，醫生會唔會喺我冇嚟嗰個星期為我做返啲嘢㗎？」
醫生要為你做返啲咩？祈個禱求上帝俾你捲土重來？
我：「我唔係好明…你冇唔舒服唔駛嚟睇醫生，醫生要做啲咩呀？」
佢：「我個個星期都嚟喎，突然唔嚟梗係我有啲事嚟唔到，但係嗰個醫生我都係需要嗰張病假證明㗎嘛，你get唔get到呀？」

哦，你想買病假紙！

我：「我哋唔會賣病假紙，你冇嚟睇醫生嘅，當日就唔會有病假紙。」
佢：「但係其實我個個星期都會嚟㗎喎，長期客喎。」
我：「如果你冇嚟到睇醫生而醫生寫病假俾你，咁就係犯法～」
佢：「香港有啲咁嘅嘢㗎咩？應該犯咗法都唔會有人知呀？我唔講咪得囉？我諗好多人都係咁啫。」
我：「我哋唔會咁做～」
佢：「我唔會成日咁㗎，久唔久一次，偶爾一次應該唔驚呀？」
我：「我哋唔會咁做～」
佢：「你有冇咩提議可以做到我要求嘅嘢呀，話晒你哋先係專業呀嘛。」
我低頭：「辭職囉，或者搵份例休星期一嘅工囉。」

佢安靜地離開診所，唔知佢係咪真係去搵份例休星期一嘅工呢～

（以上專欄由Dr-Max教材大王全力支持）