2019-10-18, 週五

【搞亂檔】盤點五大媽咪最憎老豆行為

家家除咗有本難念的經之外,仲會有個死佬!神一樣的老公會令你幸福到上天堂,豬一樣的丈夫會令你脾氣更暴躁,依家就嚟同大家盤點五大我最憎老公做嘅行為。

 20170221 6146 A1

破壞教育一致性

成日話個仔教極唔好咪就係多得個死佬,我呢頭罰佢小小嘢,你就又氹又獎縱返壞佢!

唔該你企返係老婆呢邊得唔得,要獎一齊獎,要罰一齊罰,搞到最後醜人我做曬,仔女又錫曬你,公平咩!

幫親不幫理(特別適用於親家有幫手湊小朋友嘅情況)

有時老爺奶奶真係唔啱,我出於好意反映下意見就叫我收聲!你又唔話佢地,我咪逼住出聲囉,點知你又幫親不幫理。返去先氹返我有鬼用咩,問題解決到咩;呢樣都算數,有時真係火起,同親家嘈,你唔做和事佬都算,仲加入埋人地陣形嚟恰自己老婆,真係心都灰埋。

返到屋企做大爺

如果屋企係你心目中嘅皇宮,身為一家之主嘅你當然係皇帝,但你老婆我就點解就變成宮女!

又要幫你炒d小食餸啤酒,沖完涼又幫你執返好d衫衫褲褲,雖然有時全職媽咪係負責家頭細務,但有d位明明自己可以做返都懶就無得原諒!

唔主動了解子女

叫你陪仔女玩就最叻,仔女幾時考試你唔知?學校旅行係幾時你又唔知?成績點你又唔知?家長日又唔想去!仔女邊幾個科目特別好,邊幾樣要加強,興趣喜好甚至食嘢口味你通通唔過問!就算你平時要返工,都可以主動d了解下,我同小朋友都好樂意同你分享。

地位下降

可能生女嘅媽咪會比較有共鳴,前世情人呢個稱呼絕對唔係空穴來風!自從有咗小朋友之後,對我嘅關懷同注意點解要全部轉移曬去個女身上,有時雖然都幾開心你對個女咁好,但我都會呷自己女醋,日日B女前B女後,又唔見你叫下我老婆BB豬!

圖片:網絡