【聖誕節你點過】五種最常見父母做法

1.拎3日假連放10日親子旅行

今年平安夜同聖誕節正日撞正星期六、日，只要問老細拎28,29,30呢三日假就可以一口氣加埋元旦假放10日！(12月24日-1月2日)去日本、韓國玩返7-8日都係唔少父母嘅熱門選擇，再唔係近近地台灣都好，如果你發現你年年聖誕留係香港都諗唔到有乜玩，下年都不坊試下拎假去旅行，同樣都係請3日放10日。

相關文章：2017年請假全攻略

2.放工豪「刷」

香港地打工仔尤其服務性行業同某d政府部門，即使聖誕節都放唔到假，唯有等放工先至可以同屋企人簡簡單單食餐飯！不過越難得家長就越珍惜，所以通常工作型父母都唔介意食豪DD。

3.派對媽媽會

近年好多媽媽都會自行組織屬於自己嘅圈子，圈子內嘅媽咪仔女都差唔多年紀，除左平時會交流湊仔經、數臭自己老公之外，有咩大時大節就可以自己Book個場玩一日，慳返唔少腦細胞，R爆頭都諗唔到帶仔女去邊！

Party嘅好處係由得班細路打成一片，媽咪又可以圍埋吹水，不過老豆就真係唔知做咩好。

4.平凡大眾型

仲有一種家長索性唔諗活動，最多都係食返餐好嘅，然後就去海旁逼住睇燈光倒數。不過人一世物一世，點都要帶仔女最少試一次係香港過一個本土聖誕，太細過就盡量唔好啦，因為真係太多人，一走失左就大鑊！

5.遠離煩囂

圖片:網絡

近年多咗唔少人行山，不過老實講香港嘅山實在比人低估得太犀利，依家好似多返人識欣賞都係一件好事！加上今年天氣涼涼地，行山就最適合不過，

如果想再特別d，不坊帶埋相機，係山上同仔女捕捉市區嘅萬種誘人燈光(欣賞夜景推薦飛鵝山、大帽山、嘉頓山)。

相關文章：十一條親子行山路線