【迪迪尼大比拚】香港亞洲區票價最貴

我地先睇下新票價實施後，香港比起東京同上海都貴唔少，係亞洲區最貴，咁究竟香港又係咪最好玩果個呢？

講到最好玩同最全面，真係一分錢一分貨，無錯就係美國Orlando嘅迪士尼樂園，對唔住我講錯，因為面積實在太大，所以佢正名係叫「Orlando Walt Disney World」迪士尼世界。而佢擁有四個主題樂園，包括神奇王國、艾波卡特、迪士尼好萊塢夢工場以及迪士尼動物王國 ，要玩曬真係要3至4日唔出奇！

唔好講太遠，睇返我地亞洲區三個迪士尼主題樂園先，首先睇下亞洲區最低票價，但佔地面積最大嘅上海先！同樣有「玩」成份嘅設施，數量同香港差唔多，但就有更多野睇。不過質素方面就見仁見智啦，先比大家睇一張我係佢地官網搵到嘅白雪公主圖比大家睇睇，就會明白我講咩。

而香港迪士尼面積細就一定，但同時玩樂設施都係最少嘅一個，不過香港迪士尼都知自己係呢方面比較弱，所以都經常有活動！例如以星戰主題重新包裝飛越太空山以及來年亦會新建一個全新玩樂設施「鐵甲奇俠飛行之旅」。

要數亞洲區性價比最高嘅迪士尼，一定係非東京莫屬！東京迪士尼樂園最多野玩之餘仲未計佢地仲有「東京迪士尼海洋」，平日成人票價更比香港迪士尼平足100蚊港紙。

總括而言東京迪士尼係亞洲可以話係性價比最高嘅迪士尼樂園，而呢個結果相信大家都唔意外，但鬼叫自己係香港人，仔女話去咪又係要近近地去返香港果個！