【歐陸嘉年華】價格下調更抵玩 易玩攤位逐個捉

今年睇得出友邦歐陸嘉年華更著重親子體驗，大部分機動遊戲都係「輕量級」，小朋友一定可以放足全日電！嘉年華行政總裁就最鍾意玩碰碰車，一家人每人一架又得，小朋友太細過未踩到油門同爸爸媽媽一架又得，追住自己屋企人撞都十分過隱。

 除左機動遊戲之外，仲有溜冰同埋充氣彈床，率先試玩當日都排曬長龍，好受小朋友歡迎。

溜冰場20分鍾收費$60，要輔助滑行工具就再另外收費。

值得一提嘅係今年佢地以RFID咭取代傳統代幣，令遊客玩得更有效率，大家可以隨時充值不停玩！電子代幣依然係$10蚊一個，而全部攤位遊戲都係$20蚊玩一次，所以想贏公仔就要簡d易玩嘅入手！

易玩攤位推介(根據難易度排列)

1.保齡球

有4次機會比大家擊倒保齡球樽，獎品根據玩家消耗幾球嚟完成遊戲而定，不過佢地有個古惑位，就係最後一排木樽非常接近木板，唔夠力就會令個樽挨住木板整唔跌！所以大家記得大大力炸落去，全場最易贏呢個架啦，加油啊！

2.別有洞天

有4球機會，每個洞上面都有分數，達100分或以上就已經有獎！運氣話嚟就嚟，有幾個洞係直接100分達標，運氣唔好都唔太難，都有唔少50分同20分！只要比少少心機瞄一瞄準先碌，大眼仔同毛毛就跟你返屋企架啦。

3.牛奶樽

4球只要入一球就有細獎，大家盡量採用輕力高拋戰術，玩呢個遊戲隻手特別容易過界！所以大家要小心，唔係入左都唔計數，要細力，細力同細力，很重要所以要說三次。

最具挑戰性攤位

足球

踢四次如果入到任何一個洞都有獎，小編試玩果陣亂踢都中過2次大獎(黃色)，但比錢果陣就乜都踢唔中！不過事實證明係可以贏嘅，我仲要冇踢開波添，大獎個公仔仲要係超巨型，攬住佢一定全場注目。

最伏攤位

圈汽水樽

呢個比較特別係因為圈中一個就係大獎，黃色樽特獎，所以收費都有D唔同：2個代幣（10個圈）／5個代幣（一桶圈）！但唔好以為一桶咁多個就實冇死，話說小編上年免費試玩左5桶都冇中過，不過運氣呢家野就好睇人嘅，想博一博即管嚟。

友邦歐陸嘉年華

日期:2016年12月16日 - 2017年2月12日 11am-11pm

地點:香港中環海濱活動空間   

門票:嘉年華門票最低35元（不包代幣）；

　　 成人門票港幣125元（包10個代幣），3至11歲的小童、長者及殘疾人門票港幣90元（包7個代幣）；3歲以下小童及65歲或以上長者免費。

網址:http://www.tgec.asia/