【爸媽必睇】本週五大最關注新聞

第5位：時代廣場聖誕雪樂園

今個聖誕，家長可以帶子女去過真正凍嘅白色聖誕啦！時代廣場整左個聖誕室內雪場，入到去就好似置身大片白雪中，可以盡情玩雪地活動，掟雪球、溜滑小山坡、滑雪、砌雪人等等，入到去玩的話，家長同小朋友簡直係齊齊「放電」呀！

第4位：網店中伏媽媽訴苦

近日我地又收到媽媽爆料，指一間營運無幾耐嘅手作網店專頁，服務惡劣令佢差d要報警處理。事緣毛媽(化名)某日經Facebook廣告接觸到網店，睇中一個音樂盒，落晒訂畀晒錢，但毛媽等左好耐，最終貨收唔到，擾攘接近個半月先收到店主退款！經調查更發現，網店原來另有唔少受害人留言。各位去網上購物真係要小心！

第3位：2萬平方米靚草地任跑任跳

天氣涼涼地，最好嘅戶外活動就係野餐，一家大細去野餐首選大草地，可以親親大自然之餘，又可以畀小朋友跑跑跳跳。我地今個星期介紹嘅南昌公園就係少有草地面積大、環境好，但同時又唔太多人嘅野餐好去處。周末就同小朋友去玩下啦！

第2位：合味道＋出前一丁工作坊長駐香港

近幾年日清不時係香港大搞Pop up工作坊，每次都大受歡迎！依家唔洗每年左等右等，因為佢地決定左開一間DIY學園長駐香港，名為「我的合味道工作坊」將會係11月30日隆重登場，到時大家可以自由組合屬於自己嘅味道，包裝都可以一手一腳自己設計！好得意架！

第1位：外傭沖涼去廁所都直播

本周最熱話題一定係佢！佢，擁有傲人身材；佢，行事大膽奔放；佢，樂於同人分享所有事情；佢，Facebook座擁62萬粉絲！但係佢仲係你屋企個外傭，你又頂唔頂得順？話說呢個姐姐係香港有幾年做外傭經驗，但佢平日大膽嘅直播行為引來不少人側目，更有同鄉投訴佢影衰國家形象，因為佢平日嘅直播除咗令佢僱主屋企環境全面曝光之外，最過份係連沖涼去廁所都玩直播。真係好誇張！