【珍寶豬欄】你仍然係全屋最麻煩最衰格嗰隻


雞爸一言驚醒洛克人:「上次嗰隻兔仔喺度嗰時,雞仔都未返嚟,雞仔應該係生平第一次見兔仔咋。」


咦,又好似係喎,唔怪得雞仔個反應咁大啦。兔仔喺籠入面,雞仔一見佢哋郁就會發出怪叫嘅聲。兔仔出嚟放風,雞仔就化身牧羊狗咁趕返兩隻兔仔入籠。嗰兩隻兔仔完全唔驚貓狗,自己會走埋去撩啲貓狗痴身痴勢咁,雞仔見到咁真係眼火都爆,fee到聲都沙。


我有同雞仔講:「你乖啦,兔仔都應該係暫時喺度㗎咋,佢哋搵到頭好主家就走㗎啦。」

雞仔圓碌碌嘅眼望住我,好似聽得明,又好似聽唔明咁。


我:「你仍然係全屋最麻煩最衰格嗰隻呀,放心啦,冇一隻可以超越到你地位㗎啦。」

其實我都好心郁想養埋呢兩隻兔仔,因為佢哋真係好乖,長時間放出嚟佢哋都識得自己返入籠屙屎屙尿,又可以同貓狗相處又嗲人。但係我屋企似乎真係似動物園多過人住嘅屋企了…反正佢哋都要絕埋育先會搵好人家,我又可以慢慢諗諗。唔想佢哋成為繁殖者下嘅商品,所以先絕育後搵主人似乎係必需!

 

 20190702 10541 02

(以上專欄由Dr-Max教材大王全力支持)

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024