2019-11-21, 週四

長腿爸爸Billy Cool

  • 10711

    有朋友叫Billy Cool一齊去日本大板睇樓,Billy就唔太熟日本樓巿,但就見係暑假,順便帶埋老婆同細囡去日本,當去個小旅行。

    20190826 10711 k01

    原來日本樓幾抵玩,一百幾十萬港紙都有交易。朋友睇中一個150幾萬民宿,佢話香港樓咁貴,根本買唔到,做生意又怕租貴,不如諗下將筆錢買間日本民宿,原來可以委託民宿管理公司,按出租收入分紅,業主可以收75%,25%就俾管理公司,回報唔錯,又唔困身。佢仲話將來去大阪玩,可以住喺自己嘅民宿,聽到都覺得型。

    不過,Billy Cool始終唔太熟悉日本房地產,所以望完就算,之後就帶老婆同細囡去玩。我哋搭JR去大阪兒童樂園,呢個係個唔錯嘅親子景點,可以玩成大半日。

    成個行程最令Billy Cool感觸嘅係搭JR離開嗰時嘅所見所聞。由於大部份人都係由兒童樂園返出嚟,同車上都有唔少小朋友,阿囡玩到攰,挨住媽咪瞓咗。但係,唔知點解仲有個小朋友好hyper,成個人跳咗上座椅上面,跳嚟跳去,仲要大吵大鬧!所有人為之側目,諗住佢父母會好快阻止佢啦,點知個阿爸掛住篤手機,阿媽就同一個老人家大大聲傾偈。好遺憾地,Billy聽得明佢哋講咩,因為佢哋講普通話……

    同一時間,Billy Cool留意到遠處有日本人帶住小朋友,真係有天淵之別,啲日本小朋友好乖咁坐定定,好安靜。去過日本旅遊都有留意到呢個情況,日本小朋友永遠好似個小紳士,唔會隨意哭鬧,又唔會周圍搗亂。呢個真係同佢哋由細到大嘅德育有好大關係。日本人坐JR總係靜靜地,連電話都唔會講,只會send短訊、睇報導,就算遇到嚴重天災,要去排隊拎物資,個個都係靜靜排,一句怨言都無。

    相比之下,嗰位小朋友就真係名副其實嘅「三大」──聲大、動作大、脾氣大。但又無辦法,因為大人一樣咁嘈,小朋友梗係有樣學樣。當大人長時間表現得好似世界要圍住佢哋轉嘅時候,又點可以期望小朋友會係小紳士呢?上網睇片見過有人為買手袋不惜拉住個大喼推人撞人、食自助餐又大碟大碟咁掃,嗰一刻,呢啲畫面就喺我腦海浮晒出嚟。

    望住小朋友係咁嘈,真係好尷尬,Billy Cool都識講幾句普通話,諗緊好唔好「溫馨提示」佢哋,入鄉隨俗唔好咁嘈,但係又有少少淆底,唔知會唔會引起更大紛爭……心裡面糾結咗一陣,Billy Cool都係決定龜縮唔出聲,乜都唔講做好自己本份先。之前聽有個斯斯文文嘅朋友講,出去旅行曾經俾人誤以為日本人。老土啲講句,人哋唔會因為你係咩人而歧視你,只會因為你嘅行為而睇你唔起。

     

    作者:長腿爸爸Billy Cool
       人稱工廈界Cool魔,十幾年前買入第一個工廈單位,賺到第一桶金,從此改變對財富嘅睇法:有生意當然要繼續做,但想賺大錢就要有準確嘅投資角度!

  • 10680 20190815

    最近又有龍床盤開售,平日買開工廈嘅Billy Cool當然冇興趣,見佢最細得128呎,細絕全港,講真,有能力邊個想住咁細,就算買嚟投資都揀第啲。

    20190815 10680 k02

    點解呢個龍床盤特別引起Billy Cool留意?因為其中有20個咁細嘅單位,入場門檻低到200萬,呢個價近年都絕跡,有都留番俾啲真正有需要人士買,唔通仲學呀港姐咁買嚟炒咩。

    其實,真係有人好需要呢啲盤……

    話說近日,有朋友搵Billy Cool傾偈,係一對30歲左右嘅夫婦,佢哋做普通文職,結婚幾年各自住喺原生家庭,唔太好彩嘅係佢哋收入唔多,一直努力儲錢,就一直望住樓價升,追都追唔切,所以買唔到樓。好彩嘅係佢哋嘅父母都好好,無要求佢哋走之餘,仲成日留埋飯俾佢哋帶飯返工食,等佢哋儲多啲錢。

    唔怪之得游蕙禎話:「就算我哋而家想去X嘢,都搵唔到房X呀。」

    就連呢對結婚幾年嘅夫婦都無得住埋一齊,X嘢機會自然少,何況係普通拖友呢?

    呢對夫婦都有需要,間中會平平地去下旅行,不過最近一次中咗頭獎,就有咗佢哋嘅愛情結晶品,當Billy Cool聽到呢度,就立即講聲:「恭喜呀!」

    點知個太太眼濕濕咁講:「我哋諗緊好唔好唔要……」

    「吓!」Billy Cool一直以為佢哋係嚟問買樓建議,點解變咗咁?生命嚟㗎!點可以隨便就話唔要?作為3個小朋友嘅爸爸,Billy Cool心裡好激動,但對住呢對年輕朋友,好努力冷靜返咁發問同阻止:「點解呀?唔鍾意小朋友?小朋友好得意㗎。」

    「我哋鍾意小朋友呀,不過……」

    「經濟問題?可以試吓講出嚟喎。」

    「如果係一個小朋友,我哋都勉強照顧得到,但係而家驗到係孖胎,咁就失晒預算,屋企仲邊度夠位住,就算老人家肯幫手湊,又點湊兩個呢?我哋真係唔知點算。」

    丈夫講完,太太就開始喊住咁講:「我都唔想㗎,係兩條生命呀!係我哋嘅BB嚟㗎!我驚呢一世會受良心責備……」

    丈夫都流下男兒淚,搞到Billy Cool都想喊,佢哋明顯失晒方寸,所以Billy Cool一定要更加冷靜。

    「不如咁,我哋一齊計吓數先,你哋介唔介意講有幾多儲蓄同收入?」

    「都講咗咁多唔怕講埋啦,我月入19,500,銀行有20萬左右,太太月入11,000,銀行有8萬左右。」

    Billy Cool當下就諗起啱啱睇過嘅「龍床盤」,最平嘅單位低於200萬!

    「嗰個新盤,你哋有無聽過?」

    「聽新聞講,細到剩係放落一張床?」

    「就係嗰個,你哋一定諗咁細點夠一家四口住,係唔係?不過唔好抗拒住先,都了解吓如果要買,會係咩情況。就當個單位200萬啦,借九成嘅話,要俾20萬首期,你哋係夠嘅。之後月供大概7,000幾蚊,如果你哋自己出去租,7,000幾蚊都租唔到夠大嘅單位,但係呢個細單位係你哋自己嘅物業,唔升值都至少保值。小朋友頭幾年又唔會佔好多位,咪喺呢幾年再諗吓點樣去增加收入,至少可以見步行步先。」

    見佢哋個樣,係有認真諗緊,過咗一陣,個男嘅就提出問題:「雖然7,000蚊供樓比租樓仲抵,但係兩個小朋友開支都好大,仲有唔知湊唔湊到兩個。如果層樓之後唔升值,又如果我哋之後收入無增加……」

    「咁兩個小朋友呢,就一定有啲開支,但又唔好咁驚,譬如可以睇政府醫生、讀免費幼稚園、參加免費活動、自己DIY玩具、上網搵平價二手嘢等,最重要係父母對小朋友多啲關懷同愛心,陪佢哋玩,好過單純俾物質。諗返起,我第一個小朋友出世時,家庭經濟都唔係好好,雖然係叫做老闆,但試過唔夠現金出糧俾同事,偷偷做炒散,去搵錢出糧俾同事。咁又唔代表唔開心,我同老婆一有時間就帶小朋友去郊野公園、沙灘玩,唔使點用錢,小朋友都可以有個快樂童年。」

    佢哋點一點頭,見佢哋都buy buy地Billy Cool,咁就繼續講:「我估你哋未同兩邊長輩傾,係未?」

    「梗係啦,都唔知應唔應該生落嚟,點敢同老人家講?」

    「我建議你哋坦誠同佢哋傾下先,或者佢哋好想幫手湊孫呢。至於層樓升唔升值都唔緊要,我問你哋呀,係咪覺得有機會大跌市?」

    「又應該唔會,個個都想有樓,仲有咁多人炒樓。」

    「係囉,呢個投資都應該穩陣呀,就算唔升都唔跌呀,你哋唔使咁擔心。至於收入方面,都要靠自己多啲留意身邊嘅機會,我就覺得又唔使咁悲觀,如果你哋日後仲想同我傾吓點搵錢,都好歡迎㗎,我就相信一定有方法。」

    Billy Cool當日已經盡力令佢哋對前景有返少少信心,之後都有send啲正面短訊俾佢哋,好想阻撓到佢哋,希望下年見到兩個可愛BB出世,Billy Cool真係盡咗力。喺得到佢哋確認回覆前,Billy Cool一直問點解:點解呢個正苦搞到香港人咁慘?點解唔大量興建公屋同居屋,令市民可以安居樂業?明明就有1,030公頃棕地未納入規劃,遲遲都唔處理,反而話要花6,000幾億去填海!6,000幾億可以買回好多未好好規劃同可使用嘅土地啦!再加埋落個醫療、教育資源同老人福利都得呀!好做唔做,走去倒錢落海!

    幾日之後,Billy Cool收到朋友電話:「我哋最後買咗嗰個新盤啦,細就係細啲,但都叫係我哋一個小空間啦。同4位老人家傾完,佢哋協調咗將來輪流過嚟照顧小朋友,有屋企人支持,我哋個心都定啲。」

    謝天謝地!成功保住呢兩個小生命,不過唔知咁多年嚟,正苦失衡嘅政策謀殺咗幾多生命呢?明明可以出世嘅小生命,竟然因為社會問題而失去生存嘅機會,真係好可悲。

    作者:長腿爸爸Billy Cool
       人稱工廈界Cool魔,十幾年前買入第一個工廈單位,賺到第一桶金,從此改變對財富嘅睇法:有生意當然要繼續做,但想賺大錢就要有準確嘅投資角度!

  • 10799

    早前暑假尾,終於可以一家五口一齊去旅行啦!Billy Cool就帶埋老婆同細囡由香港出發,另外兩個喺外國讀書嘅小朋友就直接飛到法國巴黎會合。已經好多年無去巴黎啦,應該有十幾年了,今次嚟到,感覺同十幾年前好唔同。回想以前,Billy Cool記憶中嘅巴黎係安全啲,無咁多人。

    20190918 10799 k01


    以前去巴黎,比較多人會提醒你要小心聖心堂外嘅「手繩黨」,驚你俾人綁住,就即刻要俾啲錢佢哋。但係今次,出發前不斷有朋友叫我小心小偷。就算到法國,我哋成日收到whatsapp溫馨提示。


    今次旅程中,為咗一解兩個喺外國讀書嘅小朋友嘅思鄉情緒,特別安排一餐遷就佢哋去食唐餐。餐館係由內地人開,一入去坐低,佢哋就不斷叫我哋要小心,財不可露眼。佢哋仲話,如果係18歲以下嘅小偷,基本上俾人捉到之後都好快放返出嚟,所以見到啲小朋友都唔好鬆懈。於是,Billy Cool真係金睛火眼留意四周環境,保護一家人財物。大概係因為我哋真係非常小心,全程都無俾人偷嘢。


    不過,Billy Cool就留意到法國貧富懸殊情況原來真係幾勁。我哋有一日喺香榭麗舍大道遊覽,去遊客必去嘅凱旋門,睇吓宏偉嘅建築物。當然,都有去啲名店,Billy Cool本來諗過買個手袋氹吓老婆,點知一去到間L字頭嘅專門店,老早就有好多人排隊,好多係同胞嚟嘅,睇落好似個個都想入去買番十個八個袋咁,佢哋買袋嘅金額,誇張啲講句,真係隨時喺當地買間屋都仲得。老婆一見咁多人排就耍手擰頭,結果我哋喺外面望吓入去,真係好金碧輝煌,不愧係總店呀。

     

    去唔成L店,Billy Cool提議不如望吓H店啦,平日喺香港見到,一個袋都等於半份首期,呢度個價錢比香港平好多,老婆聽到雙眼即刻發光,點知店員問我哋有無預先register,一望,個個袋都mark住「reserved」,咁大牌,老婆都話唔好再嘥時間睇啲香港都有嘅嘢了。


    於是,我哋行吓香榭麗舍大道,睇吓有咩景點,沿途行唔夠一個街口,就至少會見到一個乞兒。後嚟,我哋去餐廳食飯,坐喺外面睇吓街景。一餐飯啫,就已經有幾個衣衫襤褸嘅人走過嚟,唔知講咩,大概係想要錢。因為我哋驚俾咗一個就會有二三四五六多個走過嚟,所以都係耍手擰頭。通常佢哋一見侍應就會行開,到我哋食得七七八八,有個連鞋都無著嘅貌似中東裔男人走過來,手指指桌上一小包薯條,我就表示佢可以拎,佢即刻拎起邊走邊食。坐多一陣,有個著得好單薄嘅小朋友用眼神問我哋有無食物,我就叫阿囡入去餐廳買條法包,交俾嗰個小朋友。阿囡之後嚟忍唔住話:「原本法國都有啲咁窮嘅人。」

    20190918 10799 k02

    明明香榭麗舍大道係一條好風光嘅街道,而且有好多名店,但一街之內,我哋可又會見到巴黎嘅另一端景象,貧富懸殊真係無處不在。其實都無辦法,每個地方都有唔同嘅問題,法國會有難民問題,好多人都解決唔到貧窮、找唔到工作嘅困難,自然就會產生治安問題。就好似香港,有啲人係好有錢,但同一時間,有啲人窮到瞓街。一到深夜,就會發現有啲地方其實有好多露宿者,睇返數據,香港社區組織協會「廿四小時快餐店無家者研究2018」,就發現有384名無家者棲身於24小時營業快餐店,有人稱佢哋為「麥難民」,佢哋俾呢個社會忽略,政府總係鍾意粉飾太平,唔諗辦法去解決深層問題。


    Billy Cool趁呢個機會同三個仔女傾吓,希望佢哋會關心社會,要知道社會上有一班基層唔似我哋咁幸運,有屋有車衣食無憂,仲可以去旅行,甚至去外國留學。將來,有能力就要幫吓人,就算好似幫唔到啲咩,都千祈唔好成為欺壓佢哋嘅一份子。雖然個人力量有限,不過如果人人都肯思考多少少做多少少,諗吓點樣幫到基層,情況可能會有所改善呢。


    作者:長腿爸爸Billy Cool
       人稱工廈界Cool魔,十幾年前買入第一個工廈單位,賺到第一桶金,從此改變對財富嘅睇法:有生意當然要繼續做,但想賺大錢就要有準確嘅投資角度!

  • 10852

    近日同朋友傾開偈,都有唔少人計劃送小朋友去外國讀中學或大學。Billy Cool本身一早已有計劃,三個小朋友之中,大嗰兩個都去咗外國讀書,至於細女,等佢上中學都應該會送佢出國讀書。

    講真,大家一講香港個教育制度,都有好多意見,最多人講就係有太多考試同功課、硬背死記、一試定生死等問題,早幾年政府硬推國教一事,大家都仲記憶猶新。總之,望住一眾權貴高官啲仔女,個個出國讀書,我哋呢啲尋常百姓當然相信權貴高官之選啦,有能力就送小朋友出去見識。

    其中一個朋友仲話,咁多年嚟啲教育局局長都唔多似會搞好香港個教育制度,近年仲有唔少具爭議嘅政策,小朋友好似白老鼠,更加驚日後教育局會有更多政治任務去洗小朋友腦。

    講開「洗腦」,Billy Cool又唔係好驚,雖然「洗腦」兩個字聽落好負面同恐怖,不過講真,邊有咁易洗呀?如果自小家長就教到小朋友有獨立思考,咁要成功洗得到小朋友腦,都要有事實支持,小朋友先會信。另外,洗腦都有好多方法,其中有位電影發燒友朋友,就用電影嚟說明呢個道理。

    「舉個例,我個女好鍾意Disney,好似最近嗰套《阿拉丁》,茉莉公主唔係傳統公主咁等王子救,會同惡勢力抗衡。其實我發現由十幾年前嘅《史力加》開始,卡通片開始反傳統,就好似《史力加》入面個公主都好打得,而《魔雪奇緣》個Elsa又係單身,呢啲正正反映咗世界轉變,女人可以係強者,單身都無問題,無話一定要公主配王子。而家世界主流電影都會用新嘅價值觀,小朋友由細睇到大,如果你仲同佢哋講:女仔係比唔上男仔嘅,佢一定唔會服你啦。你驚唔驚小朋友俾呢啲價值觀洗腦先?」

    席間有人答話:「咁我又唔驚喎,呢啲價值觀都幾好,男女平等嘛。但係,萬一有啲唔太好嘅觀念……」

    Billy Cool決定要插咀:「咁作為家長,每日應該都有同小朋友傾下偈,了解佢老師教啲咩,如果有咩古怪,都會一齊傾吓,再俾番多啲資訊佢一齊了解。同埋唔好太睇小新生代,佢哋一出世就有電腦有互聯網,一部手機已知天下事,除非被人封鎖網絡啫,連Facebook、Whatsapp、Google、TG、LIGHK都無得上啫,否則點會咁易呃到佢哋?」

    電影發燒友繼續講:「係架,再舉個例子呀,你鍾唔鍾意Marvel?DC?007?」

    朋友答:「正呀!」

    「點解呢?」

    「型囉。」

    「Ok,咁《戰狼》呢?」

    「嗯……吳京好打得嘅,動作都好睇,不過好似打極都唔死,有啲假,總之無咩感覺囉。」

    「點解呀?啲Marvel、DC、007都好似打唔死呀。」

    「嗯,咁都有解釋到有啲英雄係有超能力,甚至超人都唔係人啦,007就有啲新型武器,同埋007都有俾人打到死死吓嘅時候,咪住!Ironman都瓜咗啦,未必打不死架。但吳生嗰個角色,無相關support卦?」

    「劇情當然係一個因素啦,其實《戰狼》個套路同荷李活動作片都幾似,只不過換成中國英雄救世界,呢個我諗先係最大嘅原因……」

    「嗯嗯嗯,又係嘅,睇戲睇得開心就算,始終現實還現實,電影還電影,無事實支持,大家都係會覺得係宣傳片。唔通睇多幾套《戰狼》,就會放棄外國護照咩?」

    「就係咁啦,要洗人腦,都要洗得高章啲,你可以話美國電影都係洗腦啦,宣揚佢哋嗰套西方民主思想,佢成功在英雄化、浪漫化、潮流化,令到全世界接受。」

    最初提出「洗腦」嗰位朋友好似對「洗腦」有新睇法,佢話:「如果有一日,個個都唔會想拎外國護照,開開心心咁留喺自己個國家,心悅誠服接受自己國家,咁就最理想啦。」

    Billy Cool又插下咀:「其實最重要係我哋要趁小朋友仲細嗰時,花心思搵啲好嘅故事書同佢哋講故仔,灌輸良好價值觀俾小朋友。從小訓練佢哋獨立思考,咁接收資訊時,就會識得分析,呢啲就係父母嘅一大責任。」

    20191004 10852 k02

     

    作者:長腿爸爸Billy Cool
       人稱工廈界Cool魔,十幾年前買入第一個工廈單位,賺到第一桶金,從此改變對財富嘅睇法:有生意當然要繼續做,但想賺大錢就要有準確嘅投資角度!

  • 20190704 10594 C 00

    最近有個世侄準備結婚,佢打算生小朋友,問我有關買樓意見:「我同未婚妻啱啱儲夠首期想買樓,唔知Uncle有咩貼士呢?我哋諗緊搬入新界西,好似近郊區環境好啲,樓價又比市區平少少,可以住大啲。」

  • 10931

    Billy Cool十幾年嚟買落啲工廈,等升值其間,當然係拎出去放租啦,最近喺觀塘一個倉庫要放租,就遇到一個「西客」,真係辛苦哂個agent。

     20191023 10931 01

    我講嘅呢位「西客」真係「西洋客人」,係外籍人士,佢要租Billy Cool個倉庫,本身個倉庫市價月租54,000左右,以多年放租經驗,都知道租戶一定會講價,所以Billy Cool先抬高少少個價,等對方還價,所以最初叫價為6萬。Agent一嚟,就話呢位外籍人士還價4萬。

     

    「嘩,一嚟就獅子開大口,低過市價咁多呀。」

     

    Agent先生就話:「我都知,不過嗰位外籍客真係好有心租你個倉,我都帶咗佢上嚟睇兩次。同埋,客人話裡面有好多嘢要拆,亦都好多嘢要整,佢話如果平到俾佢,佢裝修嗰段時間都唔需要免租期,仲有,呢排個市都唔多好,佢話生意難做呀,所以想控制到個成本。」

     

    Billy都係做生意嘅人,都明白佢呢套道理,見佢講到咁,心諗又唔係真係咁在意每月多幾千蚊,咁宜家個經濟真係差咗,做生意都吃力,於是決定收平少少。

     

    「好啦,你攞票上嚟啦。」

     

    「好呀!轉頭我會約實時間去拎票,之後再約你。」

     

    點知,隔咗一陣,阿agent先生call嚟,話:「Cool生,唔好意思呀,個客話想星期一朝早睇多次個倉。」

     

    「吓,之前咪睇過兩次囉,每次都仲要睇好長時間喎。」

     

    「係啦,佢比較謹慎,真係唔好意思。佢話星期一會俾埋票。」

     

    「睇唔緊要呀,問題係宜家已經係星期六晚,過多陣我都瞓啦。聽日就係星期日,我一早就帶小朋友出去玩,比較夜先返到市區喎,我點俾條鎖匙俾你呢?」

     

    「唔緊要,我聽晚過嚟搵你啦。」

     

    「咁真係辛苦你,明明放假,你都要陪小朋友啦。」

     

    「係呀,小朋友大得咁快,我都好珍惜同佢嘅親子樂時光,不過唔緊要啦,有時做嘢無計啦。」

     

    呢位agent先生個whatsapp頭像係個初生BB,所以Billy Cool之前都有同佢講湊仔經。

     

    到星期日,Billy Cool一早就帶埋老婆同阿女去離島玩,行下沙灘玩下水,黃昏後先回家沖個涼,之後落樓下食晚飯。其間,Billy Cool有同agent先生講,等佢安排幾時過來拎鎖匙。八點半,我哋食到一半時,就見agent先生匆匆忙忙跑到餐廳門前,Billy拿拿淋交匙俾佢。

     

    「辛苦你啦!食咗飯未呀?」

     

    「未呀,我宜家返去食啦,老婆等緊我幫手餵奶。」

     

    「咁快啲返去陪老婆同小朋友啦。」

     

    佢就急急腳走人,都明嘅,諗返起Billy啲小朋友仲係BB嗰時,我一做完嘢就歸心似箭,幾想即刻見到BB。

     

    到星期一,點知個客無交票,仲話要考慮幾日。嗰吓,Billy就feel到個客有啲似玩嘢,明明睇成3次,個價亦都係佢自己心目中個價,咁都仲要考慮?

     

    果然,過多幾日,agent先生打嚟,講:「Cool生,真係非常唔好意思呀,呢單應該搞唔掂。」

     

    一問之下,佢話個客直頭無聽佢電話,連message都唔覆。Agent先生表示一直都盡量滿足個客,個客又無話唔滿意佢,只可以話個客都唔係真係好有心租呢個單位。

     

    「辛苦哂啦,去搵其他客啦。」

     

    當日,Billy就收到另一個agent嘅電話,係一個agent姐姐,對方表示有客對呢個倉庫有興趣。咁Billy當然會叫返6萬呢個價啦,點知個agent姐姐就話個客叫價4萬蚊!又係4萬?有無咁啱呀?Billy再問清楚個agent姐姐,又係外籍西客!仲要啲terms一模一樣,不過加多一個request,就係叫我sponsor少少錢俾個客裝修喎。好明顯係同一個客啦!

     

    「吓,你都知個客個叫價已經比市價低咗一萬啦。」Billy心裡更唔舒服嘅係呢個客得寸進尺,明明之前個agent先生已經好為佢爭取,幫佢做咗咁多嘢,佢就一句唔該都無就起人飛腳,仲搵第二個agent嚟傾,Billy本身唔想再理呢個新agent,不過見佢態度又好好,又傾咗一陣。

     

    「係嘅,我當然知啦,Cool生個價真係好靚啦,不過個客話呢,真係生意難做。」

     

    後嚟,仲俾Billy問到原來個客仲request個agent唔收佢佣,即係剩收我呢邊佣!嘩,嘢就識叫agent做,佣都唔俾半個,搞到我都唔想再同呢個客糾纏,就同agent姐姐講:「咁啦,我私人出多三千蚊,你當係加你自己佣金又得,當係俾個客又得,你自己傾掂佢,總之就月租4萬蚊,收到票就約我簽約啦。」

     

    過多兩日,agent姐姐就話個客叫價月租3萬7千,嘩,之前4萬呢個價係佢自己提出嘅,Billy已經話OK啦,宜家無啦啦就再講價?Agent姐姐提議:「我都覺得減三千太多啦,Cool生會唔會考慮減五百,等個客快啲做決定?」

     

    Billy直接回覆:「我唔租俾呢個客,幾多都唔租,叫佢搵第二個單位啦。」

     

    Billy已經好唔滿意呢個客,第一,呢個客好無同理心,第一個agent做得幾好,仲為佢做咗唔少嘢,咁都要搵第二個agent去傾。第二,呢個客太唔合理,自己講完個價,又要反口。最後一點,Billy覺得呢個客做生意都唔會成功,佢花咗咁多時間同心力去講嗰少少價,不如花心機去搵錢啦。Billy都擔心將來佢生意失敗,租都交唔到呀。

     

    一句話:「凡事太盡,緣分勢必早盡。」

     

    作者:長腿爸爸Billy Cool(Facebook專頁按此)
       人稱工廈界Cool魔,十幾年前買入第一個工廈單位,賺到第一桶金,從此改變對財富嘅睇法:有生意當然要繼續做,但想賺大錢就要有準確嘅投資角度!

  • 10828 1

    聖公會,非常出名,喺香港一定會知道呢個教會,身邊總會有個朋友讀過聖公會嘅幼稚園、小學、中學,社區仲有聖公會嘅服務中心,但大家知唔知聖公會起源,原來同一段男女關係大有關係?

    20190925 10828 k01

    究竟係邊對男女咁大影響力?當然唔係普通人啦,就係英國國王亨利八世喺1834年為咗同第一任老婆離婚,另娶侍女Anne Boleyn。無故休妻另娶,遵循一夫一妻嘅羅馬天主教當然唔容許,亨利八世就選擇同梵蒂岡決裂,另外自立聖公會,成為英國國教。

    點解無啦啦講聖公會,其實才子陶傑之前喺電台講過,不過Billy唔係聽電台先知,反而係細囡同我分享嘅。話說啱啱過去嘅暑假,細囡除咗同我哋飛咗一轉法國,我哋仲幫佢報咗由陶傑帶隊嘅「暑假英語文化遊學團DIET」。Billy覺得呢個遊學團幾好,因為12日行程由陶傑設計,Billy真係見過陶傑,佢真係博學多才,絕對唔係亂拋書包,說話總係流露出佢嘅智慧同修養,令人為之拜服。

    Billy一直相信要成為一個範疇嘅專家,一定係有技巧,只要掌握得到,就會成功。就好似Billy做投資都算不過不失,起碼賺到錢,生活無憂,Billy都知當中係有啲技巧,唔係靠好彩。所以,如果有個出色嘅人教兩招,受教嘅話就真係畢生受用。如果有個好老師,教出嘅學生都差極有個譜;如果聰明人可以跟李嘉誠學做生意;籃球員跟勒邦占士打吓籃球,點都學到啲嘢嘅。

    陶傑之所以係才子,除咗佢聰明之外,相信佢係有一套學習嘅技巧,陶傑大概有講過係要帶小朋友出外見識多啲,先可以開拓視野,引導小朋友自行去探索世界,並懂得多角度去思考。陶傑設計嘅遊學團就帶小朋友去英國一啲非熱門旅遊景點,但就蘊含豐富歷史意義嘅地方,就好似聖公會嘅發源地坎特伯里座堂。陶傑相信最緊要係引起小朋友嘅好奇心,令佢哋會跨學科學習,以探索方式了解,咁先連繫到現實同自身,令小朋友覺得唔係為考試而學,而係為興趣同提升自我修養咁去學,小朋友先至會有動力,仲可以終生學習。

    Billy好認同呢一套,講真呀,宜家有個電腦,差唔多咩都查得到,但係點樣令小朋友有興趣呢?仲要識得分析同獨立思考,呢啲就要引導啦。阿囡去完12日遊學團之後,Billy見佢對英國歷史同文化多咗興趣,仲主動考Billy識唔識聖公會起源。就係因為陶傑帶佢哋去過根德郡,好生動咁講過相關嘅故事,阿囡返嚟就引導埋我一齊睇歷史,仲知道埋亨利八世原來係個賤男,先後有6個老婆,有王后被離婚,又有被誣陷而被處死,真係好唔要得。

    兩父女一齊睇歷史真係好開心,知多樣嘢之餘,仲可以一齊討論,係一個益智親子活動。Billy期望阿囡一直保持住呢個好奇心,去接觸英國歷史同文化,先可以更有動力去學好英文,真正同英國人溝通,同世界接軌。

     

    作者:長腿爸爸Billy Cool
       人稱工廈界Cool魔,十幾年前買入第一個工廈單位,賺到第一桶金,從此改變對財富嘅睇法:有生意當然要繼續做,但想賺大錢就要有準確嘅投資角度!

  • 10864

    星期日晚上,上網看著新聞,看著看著,心裡諗起一句話,就喺呢個時候,見到阿女仲未瞓。

    20191008 10864 k01

    「阿女,聽日要返學喎,快啲去瞓啦。」

     

    「爸爸不如講故仔俾我聽呀!」

     

    一定係呢兩日玩得太hyper,又會無啦啦要阿爸講故仔,其實喺阿女識得自己睇書後,我哋真係少咗講故仔俾阿女聽,好啦,阿爸都好珍惜呢啲咁sweet嘅親子時刻。

     

    「好啦,你乖乖去鋪好張床先。」

     

    見阿女自己冚好被,阿爸就決定講呢一個故仔。

     

    「今日爸爸講個故仔,係關於古時一個老宰相,呢個宰相好老啦,點知娶咗個18歲如花似玉嘅女仔。呢位後生妾侍同老宰相年紀相差太遠,所以妾侍都好唔開心。有一日,佢去花園賞花,就遇到一個年輕帥氣嘅家廚,兩個人傾得好開心,仲鍾意咗對方。之後,佢就成日偷偷去花園同家廚相會。有一次,佢就話好想多啲時間相會,所以諗到一個方法,原來呢,老宰相好擔心自己遲起身上朝,所以養咗隻雀仔每日五更就叫,隻雀一叫,老宰相就會出門口,妾侍提議喺四更之前,家廚就去用竹篤隻雀,咁老宰相咪會早咗出門口,咁佢哋咪可以見耐啲囉。」

     

    「嘩,靠隻雀,好彩我有鬧鐘啫。」

     

    「佢哋係古人嘛,之後一日,老宰相聽到隻雀叫,咪去出門啦,點知就聽到有人鼓更,先係四更,老宰相就返轉頭,發現咗真相啦。」

     

    「嘩,咁嗰兩人死硬啦。」

     

    「老宰相無出聲,照樣出去先,之後到中秋啦。」

     

    「賞月、食月餅、玩燈籠!」

     

    「古人賞月,會作下詩嘅。老宰相就叫咗妾侍同家廚出嚟,老宰相作詩話:『中秋之夜月當空,朝鳥不叫竹桿捅,花枝落到粉團上,老薑躲在門外聽。』家廚一聽,就知死啦,就跪低,作詩話:『八月中秋月兒圓,小廚知罪跪桌前,大人不把小人怪,宰相肚裡能撐船。』妾侍都知衰,同老宰相認錯。老宰相笑一笑,覺得自己同妾侍年紀相差好多,就叫佢哋兩個離開相府成親啦。所以,流傳咗『宰相肚裡能撐船』呢一句。」

     

    「嗯,兩人都好彩,遇到咁大方嘅老宰相。」

     

    「你覺得老宰相值唔值得欣賞?」

     

    「值得,因為佢咁大量,對人都好仁慈。」

     

    「呢啲叫心胸,成功嘅人就係好有心胸,唔會斤斤計較。好啦,故仔講完啦,你要瞓啦,晚安。」

     

    阿女瞓咗,諗返起日前睇嘅一單新聞,話李嘉誠喺寺裡面講話「希望年輕人體諒大局,執政者都能夠對未來主人翁網開一面」。講真,我就覺得呢段說話屬中性,想兩邊互相體諒,不過後來都引來政法委批評,仲話佢縱容犯罪,又囤積土地令「年輕人把房價高、租金貴的不滿發洩到政府頭上」。李生回應「遺憾,多年已習慣莫須有的指責,永遠會虛心接受批評」,不失溫和有智慧。

     

    香港樓價高企又點可能係一個人嘅問題,發展商當然係其中一個原因,但政府亦唔可以推卸責任,有一段時間停建公屋、居屋,又唔處理棕地問題,香港係自由巿場,內地人買香港樓推高樓巿,呢個亦係唔可以否定嘅事實。至於李先生,多年嚟喺內地捐錢起學校做慈善,大大話話都億億聲,唔通就因為一個言論全盤被推翻,仲要勞動到咁高層次嘅內地機關去批評?我心裡面即時諗到嘅,就係呢句「宰相肚裡能撐船」。

     

    作者:長腿爸爸Billy Cool
       人稱工廈界Cool魔,十幾年前買入第一個工廈單位,賺到第一桶金,從此改變對財富嘅睇法:有生意當然要繼續做,但想賺大錢就要有準確嘅投資角度!

  • 【長腿爸爸】點解人哋廁所唔臭?從廁所講一個地方嘅素質

    BillyCool鍾意一家大細去旅行,有好多地方都想去,不過,無論去邊,有一樣嘢永遠都係最大考慮——廁所。唔好睇小呢個生活細節,我每次一提議去啲較落後嘅地方,老婆第一個反應係「啲廁所污唔污糟?」明嘅,女人每日花喺廁所嘅時間肯定比男人多,對廁所要求高少少都好合理。順理成章,老婆最鍾意都係去日本。

     

    之前同老婆、阿囡去廣島食蠔,去到啲小店,BillyCool心諗間店仔咁細,個廁差啲都好合理啦,所以都無咩期望。點知一入去,個廁所雖然係細,但係超乾淨企理!去日本就係咁,啲細節每每令人心悅誠服。至於大型商場,多數廁所仲會有小朋友專用嘅廁格,size啱晒小朋友用,難怪啲一家大細去旅行嘅父母,咁鍾意帶小朋友去日本。酒店仲會用識發熱、有水洗pat pat嘅馬桶,都幾過癮。總括而言,日本廁所大部分都好乾淨同舒服,除咗經常有人清潔之外,最緊要係日本人有好高嘅公民質素,有公德心又有同理心,用嘢都盡量用得小心啲,唔會搞到一塌糊塗就走咗去。

     

    不過你可能唔知,30幾年前嘅日本,公廁一啲都唔乾淨,仲因為欠缺管理而招致旅客惡評,到80年代,日本開始做廁所改善運動,由政府行政部門、企業、市民合作,透過宣傳、教育與改善工程,多年嚟嘅努力,先有今時今日世界首屈一指乾淨嘅日本廁所。

     

    睇番香港,一般大型商場嘅廁所都好乾淨,有啲新商場仲幾有驚喜,好似K11 MUSEA,據聞成個商場入面嘅洗手間,每個都係由唔同設計師設計,真係夠心思。你可能會話,新商場廁所梗係乾淨啦,咁公廁呢?其實有一部分新公廁都好出色,好似北潭涌公廁原來有生物降解技術去淨化污物,大大減少臭味,呢啲設計都好值得同小朋友分享。

     

    【長腿爸爸】點解人哋廁所唔臭?從廁所講一個地方嘅素質

    可惜,香港仲有好多仍然好臭好污糟嘅公廁,經過都唔想入去!更加唔人道嘅係政府外判制度,合約總係價低者得,被剝削嘅往往就係清潔工人,人工低而工作量大,之前仲有人發現有啲清潔工要匿喺一個勁臭嘅廁所食飯!如果俾外國旅客見到,又會點睇香港?文明真係唔係你口講就係,人哋都有眼睇有鼻聞……

     

    一個廁所,其實包含好多道理,既然大小朋友都需要去廁所,不妨同小朋友討論下廁所背後嘅道理,刺激下佢哋對生活環境嘅睇法。

     

    作者:長腿爸爸Billy Cool(Facebook專頁按此)
       人稱工廈界Cool魔,十幾年前買入第一個工廈單位,賺到第一桶金,從此改變對財富嘅睇法:有生意當然要繼續做,但想賺大錢就要有準確嘅投資角度!