【童遊大澳】郊遊初體會 細味大澳的人情味 – 美食篇

上篇提到大澳文物酒店，為其中一個具特色景點，其實酒店會於11月7日及8日舉行開放日，並且同時舉行《尋味‧尋珍》大澳美食節，酒店製作出美食地圖，讓到訪大澳的旅客可以跟著地圖來掃街，家長就可以揀自己同子女喜歡的食物來細嚐。

大澳文物酒店開放日的免費導賞團極受歡迎，早前已經額滿，不過有意參加導賞團的家長亦不用失望，因為酒店本身亦設有恆常的導賞活動，瀏覽官方網站就可以知道更多詳情。

網址： http://www.taioheritagehotel.com/tch/homepage/Homepage

既然小編入到大澳，當然都不執輸，吃了幾款大澳之寶，鍾意尋找隱世美食的爸媽們，記得樣樣都試試！

大魚蛋：原來大魚蛋不只在長洲才找到，只要一入到大澳就會見到第一家店就在賣小吃，大魚蛋、巨型墨魚、燒賣等不難找到。而小編就在過橋之後才買來吃。

茶果：「魚蛋檔」旁就可以找到正宗隱姑茶果，種類包括雞屎滕、咸茶果及甜茶果。雞屎滕其實就係一種植物，整完之後茶果係黑色的，不過味道食落都幾特別架，而且口感煙煙韌韌呀。

紫貝天葵飲：採訪當日太陽高掛，一到大澳已經汗流浹背，看到冰涼的紫貝天葵飲，立即暑氣全消，而且酸酸甜甜的味道非常消暑。除了紫貝天葵，其實還有其他解渴飲品，由於好飲又太熱的關係，當日小編分別買了兩支紫貝天葵，一支在海味店花$10買，味道剛好不會太甜，而另一支則在大澳大會堂旁邊，跟一位推手推車賣飲品的伯伯買，價錢$8，味道會偏甜少少，兩支都夠冰涼。

糯米滋：一路步行去文物酒店途中，過了大澳郵政局之後，就會有一檔賣糯米滋的路邊小店，入面一位伯伯忙於包糯米滋，而婆婆就售貨，又有幾位街坊在閒聊，人情味十足。糯米滋有兩款，包括豆沙及花生餡，小編就買了一粒花生糯米滋試食，食落外皮薄得嚟又夠煙韌而不會粘，裡面的花生餡足料之餘，花生沒有磨得太爛，仍然保留有咬口。讚！

炭燒雞蛋仔：回程路上開始餓，到了大澳街市附近就見到炭爐燒雞蛋仔，那種回憶中的味道吸引著去買一底來試。足料的雞蛋仔，加上炭燒的味道，只能說一個字─好味！不過在大澳其實有不少炭燒雞蛋仔店，小編就只能試一間，家長們不妨試試其他，再匯報味道。

大澳沙翁：話說大澳有一間餅店，所售的沙翁又香又甜又好味，經常大排長龍，沙翁是小編至愛，未出發已經念念不忘想咬一口，可是採訪當日竟然無開舖，灰爆！只好敗慶而歸。

其記凍茶：其記也被列於美食地圖入面，小編就試了拿手的凍檸茶。家長一定會問凍檸茶有幾特別呀？事實是其記的凍檸茶係無檸檬嘅，夠特別未先？這杯凍檸茶之所以無檸檬，因為店主一早將檸檬「篤」好，直接將茶雪在凍箱，就算無冰又無檸檬，都夠凍又夠檸。

其實大澳還有很多值得大家探索細味的小店及故事，美食當然多不勝數，家長何不趁秋天，與孩子一同走一遍，一起放鬆身心，尋找不一樣的大澳！

延伸閱讀：

【童遊大澳】郊遊初體會 細味大澳的人情味 – 簡介篇

【童遊大澳】郊遊初體會 細味大澳的人情味 – 風景篇

【免費活動】勿失良機！遊戲童樂日公開招募

父母最關注：

【仔女好難教】 資深校長 2 招改善孩子惡習

【相當有效】 8 個鼓勵孩子學習的方法

【心理測驗】 小朋友有壓力嗎？

【專業社工教路】 小學生拍拖 阿媽點處理？

【湊仔貼士】 做個開心快活媽咪 13 式