【珍寶豬欄】周潤發 vs. 任達華

佢嘅咳聲非常響亮,即使醫生俾幾多咳水佢,照過幾多次肺,一直都搵唔到咳嘅原因…聽同事講,佢已經咳咗幾年。初初我見佢咁咳法,會覺得佢好慘好可憐,但係久而久之,我開始不再帶有一絲同情憐憫之心…


坐喺度同樣等睇醫生嘅父子,仔仔每次一聽到咳聲就會立即掩鼻。


熟客留意到仔仔有咁嘅反應,於是同仔仔講:「你有冇家教㗎?當住人面掩口掩鼻做咩呀你?你有冇禮貌㗎?」

爸爸見到自己個仔俾佢鬧:「你做咩話佢呀?你痴線㗎?」


熟客:「我咳關你哋咩事呀,咳!咳!我係要咳呀!」

阿熟客呀,查實你把聲同咳聲都好刺耳呀,你咳還咳,唔好撩交打咁款啦,你唔好以為你咳聲大大就BODY大大先得㗎,人哋一拳KO你啦。

 

熟客繼續響亮地咳,咳,咳。
仔仔掩住口向爸爸講咗一啲嘢,我聽唔到。
爸爸就大大聲講:「可能呢個叔叔冇讀過書呢,學校有教咳要掩口,佢可能冇返過學呢。」

 

熟客反擊:「我名牌大學畢業㗎!」
係咪福建炒飯大學呀?

 

爸爸望住熟客講:「你講就係呀?我係周潤發添呀。」

熟客:「咳!我係任達華呀!」

 

醫生靜靜雞行出嚟問我:「咩事咁嘈呀?」
我眼神死:「周潤發同任達華喺度鬧緊交呀~」
醫生一頭問號:「吓?佢哋鬧咩呀?」
我:「嘈緊唔掩口咳…」
醫生即刻認得熟客嘅咳聲:「又係佢呀?」
我:「係呀。」
醫生:「佢係周潤發定任達華呀?」
我:「任達華呀。」
醫生笑笑擰擰頭『唉,嗌任達華入嚟啦』咗一聲行返入醫生房。

我向出面嗌:「阿任達華可以入醫生房啦。」
熟客好自然咁自己企起身行入房。

 

爸爸見熟客入咗醫生房之後問我:「佢係咁㗎?」
我:「佢冇咩嘢㗎,唔駛太擔心,小朋友好叻呀,識得咳要掩口~」
仔仔問爸爸:「咩叫任達華呀?」
爸爸:「係一個人名嚟,明星嚟呀」
仔仔大感震驚:「頭先個叔叔係明星?吓……..」
又真係好難令人相信嘅,不過你爸爸都話自己係周潤發啦,今舖打和啦Super!

 

珍寶豬欄

 

(以上專欄由Dr-Max教材大王全力支持)

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024