【小胖阿七】打工仔「大時偷金」 品德教育好重要

阿七有朋友開物流公司,之前約佢食飯,一問起佢公司好唔好,佢就唉聲嘆氣。

 

「咩事呀?生意唔好?」

 

「唔係呢樣囉,我覺得我個伙記呃保險呀。」

 

「係?點解你咁覺得?」

 

「幾個月之前,我請搬運工人,有個高大後生仔嚟見工,見佢幾醒目又幾誠懇,咁就出萬五蚊請佢,一個星期返5日,算係咁啦。3個月試用期好快過咗,佢都做得幾好,我仲加佢1,000蚊人工添,佢就同我講佢會比心機做,想我加夠3,000,見佢都幾好,咁就應承咗佢。過咗幾日,佢喺公司搬嘢嗰陣突然『呀』一聲大叫,之後就話腰同頸都好痛,我拿拿林叫佢去睇醫生。」

 

「個timing好令人懷疑喎。」

 

「當時我一啲都無懷疑佢,仲好擔心,叫佢抖夠先返工。」

 

「咁幾時開始你先覺得佢呃你?」

 

「之後一個半月,佢每隔4日就交張醫生紙返嚟,我問啲同事,佢哋話都唔覺佢扭得好傷,唔明點解休息咁耐都好唔番。」

 

「咁你諗住點?」

 

「無計啦,佢有醫生紙,根據法例,又真係要賠俾佢。」

 

「賠月薪嘅五分之四喎,即係個個月一萬四千四咁俾佢,唔驚保險公司加你loading呀?」

 

「梗係驚啦,但係我都唔知點算。」

 

「老友提提你,佢最多可以咁拎足兩年!」

 

「兩年?」

 

「係呀!」

 

「咁保險公司實加loading啦!今次慘啦!」

 

「你可以搵私家偵探查一查,有證據就可以通知保險公司。」

 

「私家偵探?」

 

「佢哋好叻做呢啲嘢,你搵佢哋,佢哋就識做架啦,睇下個僱員有無去做運動,係唔係如常咁行路,甚至睇下佢有無返第二份工,咁就知道佢係咪真係呃你。」

 

於是朋友就聽從阿七建議,過咗一排,佢就call阿七。

 

「好彩聽你講去搵私家偵探查一查,影到佢真係跑步追巴士喎,簡直健步如飛,邊有傷呢?跟住我哋即刻通知保險公司,保險公司之後仲發現呢個員工有前科,而佢填資料時無申報!」

 

「其實呃保險可以係刑事,你有無追究落去?」

 

「我話咗佢幾句就算,見一場主僕,同埋佢又咁後生,當俾多一次機會俾佢啦。」

 

「你都幾善良,不過我估佢都好難再呃保險,已經呃過兩次,以後保險公司一定會特別留意佢!」

 【小胖阿七】打工仔「大時偷金」 品德教育好重要

呃保險當然係犯法,亦係非常缺德嘅行為,為咗令自己得益,但就係危害緊大眾嘅權益,因為羊毛出自羊身上,有人呃保險,就會令保險公司加保費,甚至有拒保嘅情況,令誠實嘅投保人受害,最終會令所有人受害。不過,僱主同保險公司都唔好傻,只要有懷疑就要去查證,所以若要人不知,除非己莫為,大家切勿以身試法。

 

作者:小胖阿七(Facebook專頁按此)
   本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024