【小胖阿七】軒尼詩道新常態:大媽幫烈日full gear列陣

行到去軒尼詩道,經過祖國人壽大廈,嘩!真係蔚為奇觀呀!條街30幾度熱死辣辣,一班大媽,目測應該都有廿幾個,個個身穿整齊套裝裙一字排開,場面真係非常壯觀!

佢哋用唔鹹唔淡嘅廣東問:「腥生腥生,你巧呀!過來睇吓啦!」

我係咁意路過,已經有幾位大媽包圍住,望一望後面,點解老婆同阿仔喺咁後架?衰啦衰啦,一陣以為我俾班大媽吸引住咪大鑊?撞鬼咩,大媽喎!如果佢哋後生番廿零三十年,都尚算秀色可餐,個feel可能咁好似入去咗玩,成排靚女招呼你……

咪住!我突然醒一醒,係喎,佢哋只係sell保險嘅大媽,所謂知己知彼,有40年保險銷售經驗嘅阿七,呢個時候發揮專業精神,刺探一下對手軍情,即管同佢哋嗲兩句,聽吓咩料子先。

「你哋著到咁,唔熱咩?」我問。

「唔會!為腥港人服務係喎哋嘅使命,喎哋唔怕辛苦,盡心盡力巧巧去服務尊貴嘅客人!」剎那間,唔知點解喺炎炎夏日,阿七都打咗個冷震,呢啲說話都講得出口,好似同個chatbot講嘢咁……就喺呢個時候,老婆同阿仔行到我身邊,我就順勢跟埋老婆同阿仔走人啦,立即返回人間。

之後阿七有好好諗過,明明大家都係sell保險,點解佢哋嘅用字咁陌生?應該話,佢哋嘅說話只適合出現於印刷品,講到出口就好阿諛奉承,可能中資背景所以奉行呢套啦。阿七打過40年鬼佬工,而家被逼轉去另一間曾經有「美國」二字嘅保險公司做(後來馬雲收購咗就無咗呢兩個字),雖然變咗中資,但係啲同事都係跟開外國嗰套,絕對唔會好似祖國人壽咁肉麻當有趣……

回顧多年嚟身邊嘅同事,大家雖然俾好多人叫做「保險佬」,但係我哋都自知保險銷售都係一門專業,總會見過害群之馬為求開單信口開河,有啲甚至缺德到呃呃騙騙。不過日久見人心,做得好嘅同事俾人誤會咗一排之後,如果真係幫到客人,客人就會改觀。老實講,氹客人人都會,不過點到即止,主要都係講多兩句讚美說話,年頭送月曆同利是封,但係就算打死阿七,都真係講唔出嗰位大媽嘅說話!

20190703 10545 k01

香港人會唔會受呢一套呢?睇番近年祖國人壽喺香港嘅生意,又真係OK喎,而喺街上都成日見到班大媽sell保險,諗諗吓,仲有朋友話去中旅社拎回鄉證時,裡面都有祖國人壽sales。嗯,阿七突然諗通咗,日日都有150個新移民落嚟,應該同廣東話唔鹹唔淡嘅大媽同聲同氣,自然有生意啦!諗到呢度只可以用「兩地文化大不同」做總結,可能我多年嚟都係主攻香港客,無留意世界已經悄悄地改變。

等等先,我好話唔好聽都係保險業界前輩,如果咁都唔夠班年紀唔輕但資歷咁淺嘅大媽鬥,實在係太丟臉啦。阿七要諗諗點樣因應市場轉變,加埋以過往嘅經驗,開拓下呢個新興巿場先得。

 

作者:小胖阿七
   本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024