【甘寧老師】真係要贏在射精前?

【甘寧老師】真係要贏在射精前

我地都鐘意自欺欺人,一邊批評別人怪獸家長,填鴨式教育。一邊乖乖定時定候上繳會費比補習社;名校收生年年瘋搶學位,其實家長嘅行為正正反映,大家比任何人更清楚有起跑線!

社會上有「起跑線」已成一個事實,我隨便舉個例子,最近一個研究報告指,港大醫學院追蹤於港島和元朗隨機邀請的20間本地幼稚園約556名K3學生,先替他們測試各項能力,並在3年後為這批學生升至小三時再作評估。結果發現,來自低社經地位家庭的幼稚園K3學童,智能發展整體表現已比擁高社經地位家庭的學童差23%,其他各項能力指標如身體機能、社交及情緒管理、認知表達及溝通等,也差16%至25%不等;

到這批K3學童升至小三,兩組學童能力差距更大,其中低社經地位家庭的學童的行為問題風險,更比高社經地位的多近三成。

以上嘅事實好殘酷?其實仲未夠,貧窮的人讀不成書,搵到嘅工作自然有限,即使肯半工讀選擇仍不多。有錢人讀唔成書?Sorry,我暫時未見過,坊間實在太多有錢就讀到嘅大學,而各行各業都偏愛英文能力強的外國回流生*,佢地浸完咸水返嚟,分分鐘同讀到本地大學的學生有差唔多待遇。

*不包括去外國讀野雞大學之餘仲要群埋亞洲人日日講中文果堆

除此之外,節目內更有家長大膽咁指出「贏在射精前」呢個概念。預計孩子出生日期,年頭出世係入讀時間上更易獲得學校青睞,因為早讀書早發育會令佢o地有更大機會得到重點培訓,不得不說這種風氣是家長和學校合力造成的!

而我覺得有趣嘅係下面嘅留言,大家一面倒指責片中家長,其實所謂「贏在射精前」只是「大B」、「細B」嘅另一說法(有部分家長以大B細B形容出生月份而非實際年齡)。大家對於殘酷嘅事實好似特別反感,但轉一個講法又接受到,講白d姐係接受唔到現實。

其實出生月份影響整個人生嘅說法一早已經有,7年前由Malcolm Gladwell所寫嘅Outliers: The Story of Success譯作《異數:超凡與平凡的界線在哪裡﹖》,本書內容提及成功嘅人士較多係邊月出世,雖然只係出世早人幾個月,但遲出世嘅3歲B仲拎住支筆亂畫,早出世嘅3歲B已經有人教緊佢拎筆姿勢,就係呢d些微嘅領先,導致雪球不斷滾大的現象。

本書帶出嘅信息好簡單,咩醫生、大律師、科學家同各領域嘅天才等都係Outliers,唔係話佢地唔努力,但其他人係為勢所逼努力搵錢養家之時,佢地可能係努力讀書向上爬。佢地嘅成功其實可能冇咩特別或值得學習之處,只係運氣同社經地位優勢等導致佢地與別不同。

總括黎講,其實貧窮並唔可怕,可怕嘅係我地為左下一代唔貧窮,捨棄左更值得擁抱嘅家庭溫暖,珍惜親子時光起碼我一定可以得到開心!但你做左咁多野,確保到仔女將來一定可以飛黃騰達?

圖片:網絡截圖 

 

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024