其實BB初初都不會出街太多，所以最重要係準備打底和尚袍，因為分分鐘一日要換幾件，如果咁計落買都買到窮，好彩朋友慷慨將新束束的衣物轉贈，而家囝囝未出現已經有好多衫仔等住佢著，最多都係添置一兩件見人嘅衫仔。

話咁快下個月就生得，小編昨天趁放假又好天已經進行咗首輪清洗BB衫工程，首先未洗之前就先幫洗衣機做咗清潔，用咗清潔洗衣機專用粉，配合洗衣機有的清潔滾桶模式，總共清潔咗兩轉，之後就將第一機BB衫放入去，用BB專用洗衣液來清洗嬰兒衫。由於洗衣機有個專洗BB衫嘅模式就開嚟試下，原來佢自動調較咗用熱水洗BB衫，感覺真係乾淨同埋消咗毒咁。

洗完之後就晾起啲衫仔，見到呢個全部都係BB衫嘅畫面，真係好期待呀！各位媽媽，你哋當時係咪都有相同嘅感覺呀？又覺唔覺得有二手衫執真係慳好多？定或是你哋比較喜歡用第一手嘢多啲？歡迎留個言分享，又或者提供下你地洗衫嘅小貼士丫。