2019-12-16, 週一

【我愛媽媽】有小朋友之後媽咪放棄嘅事

盡責又肯為子女無私奉獻嘅媽咪都十分值得尊敬!歌仔都有得唱「世上只有媽媽好」,絕對無呃人,我地一齊嚟細數當你做咗媽咪之後,到底放棄咗啲咩嘢。

 20170113 5797 A1

1.放棄睡眠時間

照顧初生BB果段日子只可以用四個字嚟形容,就係「不堪回首」!隔幾個鐘就要掃風餵奶,夜晚又無啦啦喊,真係無覺好瞓,有部分小朋友仲特別早起身嘈住你陪佢地玩!唔好以為仔女大個就有覺好瞓,返學你要早過佢起身煮早餐,夜晚仲要陪佢做功課氹佢上床瞓覺,諗起都辛苦。

2.放棄鐘意嘅嘢食

有打算餵人奶甚至曾經餵過人奶的媽咪就會好認同呢一部分!望住最愛嘅日本刺身海膽都無得食果種痛苦,咪以為到仔女大返少少果陣就會無事,有時自己好鐘意食嘅嘢未必健康,唔想仔女跟住一齊食,唯有放棄埋!

3.放棄娛樂

未有小朋友之前,你可以經常同另一半去睇戲食飯,返屋企又可以睇電視玩電腦!但依家要湊仔通通都要放棄,連約朋友食餐飯都變得越嚟越少。

4.放棄做自己

我地嘅行為說話都會成為仔女模仿嘅對象,平時馬路見無車就過,某幾樣蔬菜自己明明都唔太鐘意食,係仔女面前都要強顏歡笑食曬!平時講嘢大大聲,嬲果陣仲會偶爾講一兩句粗口,依家全部都戒曬,所以點解啲人會話結咗婚個人係唔同咗,其實係有小朋友先係主因!

圖片:beth retro