2019-08-25, 週日

【葉偉麟專欄】不用言教的方式 就真心的分享

9529

 

一個4歳男孩脾氣容易失控,跟小朋友玩耍時似乎更見衝突,家長屢勸無效,結果有時連自己也崩潰破口大罵孩子,情況更加一發不可收拾。

家長:「佢成日同人爭嘢玩,點先可以令佢斯文啲識得sharing ?」

我:「你似乎好想自己小朋友盡快學識sharing ?」

家長:「比第啲家長見到會話我冇家教,好冇面啦。」

我:「冇面係我哋大人嘅諗法,如果小朋友為咗家長有面,而被逼要急於去sharing,咁佢反而有機會為咗滿足大人嘅需要,乜嘢都唔敢say no,唔敢表達自己真正諗法,爭取自己喜歡嘅嘢。」

 20181122 9529 B01

家長:「但咁佢第日咪會變到好自私?」

我:「我想問吓,假設你三日冇食嘢,餓到就嚟死,你最想要啲乜嘢?」

家長:「食buffet!」

我:「又假設你食咗幾日buffet後,你又會點諗?」

家長:「好滿足啊。」

我:「再假設要你連續一個月,早午晚餐餐豪華buffet,你又會有咩感覺?」

家長:「哇,都有啲厭唔想再食。」

我:「咁你又會唔會介意將手上buffet嘅食物同朋友分享?」

家長沉默靜思,嘴角露出一絲微笑,似乎明白了一點道理。

後來有一天,這個孩子在治療室繪畫,他用飲筒在畫紙中間部分,塗了很大部份紅色,然後說:「呢啲係火!」

我:「啲火喺度做乜嘢?」

孩子:「郁嚟郁去!」

我:「我見到你好用力畫D火。」

孩子:「好大火呀!」

我:「好大火,啲火有咩感覺?」

孩子:「唔開心! 郁來郁去!」

我:「原來啲火覺得好唔開心。」

然後孩子用了5分鐘,很用力在畫紙上畫火。我就在旁邊靜靜的陪着他。

後來他開始利用藍色,用飲管印了一個個圓圈出來,而情緒明顯平復了。

我:「我見到一個個藍色嘅圓圈。」

孩子:「呢啲係M &Ms 朱古力。」

我:「有好多粒喎。」

孩子繼續印圓圈,然後忽然甜絲絲說:「我而家有好多M &Ms 朱古力!」

我:「係喎,你有好多粒喎。」

孩子:「係呀,俾啲你啦。」

我:「多謝你啊,好多謝你嘅分享。」

然後我倆就高高興興繼續印印畫畫。

 

其實當我們能夠站在孩子角度看世界,了解他們背後的情緒及需要,讓他們獲得滿足後,自然不用言教的方式,他們就會懂得真心的分享。

×