【長腿爸爸】發吓夢先:如果有50層樓,我會……

早排睇新聞有個訪問,有位人兄人到中年,手持50個物業,大家估吓佢而家有咩搞作?

20190820 10690 k01

喺大家估緊嘅時候,Billy Cool就發吓白日夢,如果我有50層樓,第一個反應:「梗係做自己有興趣嘅事啦。」
第二個反應:「我都好想老婆做到自己想做嘅嘢!」
第三個反應:「我都會想三個小朋友專心追逐佢哋嘅夢想!」
講真,香港係M型社會,有錢人越來越有錢,窮人好難有上流機會,樓價貴,上車難,好多人為咗一個單位,牢牢地賣身俾一份工,工又唔敢轉,老細無理要求就硬食。租金又貴,生意就難做,辛辛苦苦賺埋都俾晒業主,仲點會加人工俾員工?喺香港,生活艱難,夢想?太奢侈啦!
講遠咗……嗱,如果我有50層樓……都係先講點成就老婆個夢想,佢雖然都40幾歲,但仲有個少女夢,好鍾意得意可愛嘅文具仔,一去日本、台灣就買買買。Billy Cool見啲嘢細細件,又唔係貴,就一直由佢。不過,老婆都開始覺得唔知擺邊,於是唔敢買太多。如果我有50層樓,就俾個單位出嚟,裝修到成個showroom,俾佢任擺。
至於小朋友,大仔鍾意四圍去,年紀輕輕,都已經試過做backpacker,窮遊幾個月,走去搭順風車,識當地朋友,佢成日話要環遊全世界,如果呢個係阿仔個夢想,我會由佢去,有需要就支助佢。
阿二幾有音樂天份,試過作吓曲,自彈自唱,如果呢個係佢個夢想,我就買個錄音室俾佢,等佢有空間做音樂,再俾一層樓佢收租,咁就一定唔會餓死。有需要就搵人拉吓關係,做埋宣傳,幫手捧紅佢。
至於阿細鍾意寫吓文,文人係香港難搵食,唔緊要,老豆有50層樓,大把空間俾佢去創作。


好,講番自己有咩想做先,其實做個「造夢者」都幾好,如果咁有錢,咪睇吓出面啲後生仔有咩新idea,夠諗頭嘅話,就注資落去,分分鐘會成功,當考吓自己眼光。如果呢個世界多啲人有夢想,就會更加美好。

發完夢,Billy Cool對腳落返地面,當然係冇50層樓,而家生活雖然算OK,有車有樓有投資,供到小朋友去外國讀書,但同50層樓仲有好遠好遠嘅距離!所以,我會同小朋友講:「老豆夠錢養自己同老婆,你哋唔使擔心要養父母,不過你哋如果有夢要追,就自己諗計啦,發揮你哋嘅頭腦,老豆永遠支持你哋!」
講番訪問中嗰位人兄,有50層樓嘅佢,因為好鍾意飲日本清酒,又發現香港比較難搵到優質嘅清酒,於是佢就開間清酒店,就可以訂到數以百計嘅好酒,仲要以品質為上,所以不惜運輸成本,都要keep到酒質。佢仲話:「由頭到尾都無諗過會賺錢,蝕錢都唔介意。」
據聞呢位人兄亦係一間地產店嘅創辦人,呢壇生意將來要佢個囝囝接棒?佢就話阿仔對地產無乜興趣。訪問中無再考究佢個仔鍾意啲咩,不過見佢咁識享受,唔係諗住賺錢賺到盡,唔通佢就係一個「造夢者」?會任由囝囝去追夢?Billy Cool希望佢係啦,「夢想」而家對香港嚟講真係好奢侈,如果有錢人都剩係要賺到盡、算死草,香港仲有希望咩?

作者:長腿爸爸Billy Cool
   人稱工廈界Cool魔,十幾年前買入第一個工廈單位,賺到第一桶金,從此改變對財富嘅睇法:有生意當然要繼續做,但想賺大錢就要有準確嘅投資角度!

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024