2019-08-18, 週日

【小胖阿七】出發啦 歡迎報名參加「無賴投訴團」!

20190729 10630 C 00

又到暑假,身邊唔少老友都一家大細去遊埠,日日Facebook都俾啲旅行相洗版,可惜阿七今年要跑山,暑假就行唔開嘞。

20190729 10630 k01

講開旅行,阿七有個客兼老友,又係想趁住暑假同老婆仔女去土耳其玩,雖然我冇得去,但想成人之美,咪幫佢一家人幫團囉。因為呢位朋友一家人係由內地移居香港,仲未係永久居民,正值呢段過尷尬時期要中港兩邊走,所以就叫阿七幫佢哋去某大旅行社報一個價值萬二蚊嘅土耳其團,見佢咁爽手過數俾阿七,咪即管幫佢。

報團嗰陣,旅行社職員千叮萬囑:「一定要自己辦簽證,我哋唔能夠代辦。我哋張單據有條款寫清楚,如果因為簽證問題而不出唔到發,係唔會退款。」

阿七都千叮萬囑朋友,一定一定一定要自己辦簽證,真係重要的事要講30幾次,煩到個朋友都話:「行了行了,我知道啦!」佢仲話,國內有代辦,佢會搞得掂。OK,咁就得啦,祝佢玩得開心啲。

點知……阿七都唔知佢搵咗咩代辦,佢去到機場搵領隊,個領隊一望,就一臉無奈咁講:「你們這個是非合規簽證。」

阿七聽到真係嬲咗,唔係嬲旅行社,係嬲個朋友,叫極佢都仲係錯。當中詳情我冇心機問,總之結果就係佢哋成家大細無得上飛機,睇住啲團友入晒禁區,佢哋就拖住行李喼返歸。佢好唔開心咁打俾旅行社要求退款,當然啦,人哋條款都寫到清清楚楚,錯又不在對方,點可能退款,如果咁都退得,啲旅行社一早執鬼晒啦,衰啲講句,呢度仲有少少法治,仲會講合約精神嘛。

個朋友真係好不滿,叫阿七陪佢踩上旅行社理論。吓!阿七賣咗咁多年保險,都好著緊條款。保險就係一份合約,講求最高誠信,有咩爭拗都係睇條款,大家尊重合約精神,先至可以有保險存在。

我話:「但是,真的是你們犯錯,他們有權不退呢!」

佢話:「我不管,我要去!」

唉,見一場朋友,硬著頭皮陪吓佢去啦。

去到旅行社,職員就幫佢退咗少少印花稅,其餘團費當然唔可能退啦。

朋友就不斷同職員講要求退款,職員就指住單據上嗰一行條款。朋友突然轉頭望向阿七:「你幫我說說吧,我說普通話他們不聽我的。」

吓?關咩事呀,我哋行咗兩文三語好耐啦。個職員就係完全明白你想點,所以先企到咁硬。仲有呀,阿七咁樣陪佢嚟,本身已經覺得好核突,仲要我幫手出聲?

於是阿七拉咗佢出門口,認真咁同佢講:「他們真的有權按照本子辦事,也沒辦法呀。」

「不!一定有,我立刻想到6個方法。」

「什麼?六個那麼多?」

「第一是每天坐在旅行社門前抽煙,見到他們有客就過去跟他們說這是黑店;第二是在網上寫臭他們;第三是到你們的消委會投訴;第四是去旅遊業議會投訴;第五是到海關投訴;第六是找傳媒投訴。」

大佬,香港啲「自由」笨唔係咁用喎,佢當然可以咁做,不過絕對會係嘥自己時間攞假嚟丟,最後都唔會達到佢嘅目的。

阿七細心同佢解釋點解呢六個方法唔work,點知換嚟佢一句:「什麼都不行,你到底是不是來幫我的?」

Well,想幫你慳返啖氣暖吓肚啫,咁阿七都無嘢講啦,原來佢去唔成土耳其,結果轉咗去參加「無賴投訴團」,咁一場朋友,佢去邊玩我都仍然會祝佢好人一生平安嘅。希望佢去完呢個投訴團返嚟,會真正明白咩叫做合約精神,有錯就要認,千祈唔好好學唔學,走去學啲高官咁做無賴,套用阿人氣議員一句:真係唔好再咁玩啦,好冇?

作者:小胖阿七
   本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

×